ទម្លាយជីវិតក្នុងពន្ធនាគាររបស់តារាប្រុស Kris Wu ក្រោយបាត់បង់សេរីភាពរស់នៅក្នុងគុក ៤ ឆ្នាំ

ភ្លេចៗខ្លួនមួយភ្លែតសោះ តារាប្រុស Kris Wu បានជាប់ពន្ធនាគារអស់រយៈពេល ៤ ឆ្នាំមកហើយ ក្រោយពីត្រូវបានតុលាការកាត់ទោសក្នុងក្តីចាប់រំលោភកាលពីឆ្នាំ ២០២១ កន្លងទៅ​​ ឱ្យជាប់ពន្ធនាគារចំនួន ១១ ឆ្នាំ ៦ ខែ និង ១ ឆ្នាំ ១០ ខែទៀត ក្នុងករណីរួមគ្នាប្រព្រឹត្តរឿងអនាចារ ដែលសរុបទាំងអស់ចំនួន ១៣ ឆ្នាំ ព្រមទាំងត្រូវពិន័យជាប្រាក់រាប់លានដុល្លារទៀត។

យ៉ាងណាមិញ​ ថ្មីៗនេះមានការលេចឮព័ត៌មានពីជីវិតរបស់ Kris Wu នៅក្នុងពន្ធនាគារថា គេទទួលបានតួនាទីជាប្រធានអ្នកទោសប្រចាំគុក ដោយត្រូវមើលការខុសត្រូវទៅលើអ្នកទោសផ្សេងៗ តែតួនាទីនេះក៏ធ្វើឱ្យគេបានទទួលសិទ្ធិពិសេសៗ ដោយបានអាហារល្អជាងអ្នកដទៃ មានដូចជានំចំហុយ ជាមួយស្ពៃក្តោប និងពងទាចៀនប៉េងប៉ោះ លើសពីនេះទៅទៀតនោះ គឺព័ត៌មានបានឱ្យដឹងថា លោកឡើងទម្ងន់រហូតដល់ទៅ ៩ គីឡូឯណោះ។​

ដោយឡែក ថ្មីនេះៗ Kris Wu អាចនឹងត្រូវតុលាការកាត់ទោសក្នុងករណីគេចពន្ធទៀតផង ដែលមានន័យថាគេនឹងត្រូវតុលាការបន្ថែមរយៈពេលជាប់ពន្ធនាគារពីលើទោសដើមថែមទៀត។ ជាពិសេសនោះ ក្រោយពីចេញពីពន្ធនាគាររួច Kris Wu ក៏នឹងត្រូវនិរទេសឱ្យចេញពីប្រទេសផងដែរ៕

ប្រភព៖ Sanook