និស្ស័យច្បាស់ចែស! ចោរលួចឡានទៅបាត់ ខំសន្សំលុយទិញថ្មី ចៃដន្យទិញប៉ះចំឡានចាស់ដែលចោរលួចនោះមកវិញ

សារព័ត៌មានបរទេស បានរាយការណ៍ពីរឿងរ៉ាវដ៏គួរឱ្យហួសចិត្តរបស់បុរសជនជាតិអង់គ្លេសម្នាក់ ដែលត្រូវចោរលួចឡានបាត់មួយគ្រឿង ដល់ខំចំណាយលុយអស់ជិត ៣ ម៉ឺនដុល្លារដើម្បីទិញឡានថ្មី ស្រាប់តែទិញប៉ះចំឡានខ្លួនឯងដែលចោរលួចទៅដដែល។

បុរសរូបនេះមានឈ្មោះថា Evan Valentine អាយុ ៣៦ ឆ្នាំ មកពី Solihull ប្រទេសអង់គ្លេស។ ក្នុងនោះ Evan បានរៀបរាប់ឱ្យដឹងថា កាលពីប៉ុន្មានខែមុន គេបានបាត់ឡានមួយគ្រឿងម៉ាក Honda Civic Type-R ពណ៌ខ្មៅ ដែលចតចោលនៅមុខផ្ទះ ហើយក៏បានប្រញាប់ផ្តល់ដំណឹងទៅអាជ្ញាធរ និង ក្រុមហ៊ុនធានារ៉ាប់រង។ លុះក្រោយមក Evan ក៏សម្រេចចិត្តទិញឡានថ្មីមួយគ្រឿងទៀត តែយកម៉ាកដដែល និង ពណ៌ដដែលឱ្យដូចឡានដើម ព្រោះតែស្រឡាញ់ខ្លាំងពេក។ Evan បានចំណាយលុយប្រមាណជា ២ ៦០០០ ដុល្លារឯណោះ ដើម្បីទិញឡានថ្មីនេះ ពីអ្នកលក់មួយ ដែលនៅឆ្ងាយពីផ្ទះគេប្រមាណជា ៧០ គីឡូម៉ែត្រ។

យ៉ាងណាមិញ ពេលទិញឡានរួចរាល់ ហើយបើកមកផ្ទះ Evan ស្រាប់តែសង្កេតឃើញរបស់របរជាច្រើននៅក្នុងឡានថ្មីនេះ គឺស្រដៀងនឹងឡានចាស់របស់ខ្លួនដែលបាត់ទៅ ហើយរឹតតែសង្ស័យទៅទៀតនៅពេលដែលឃើញថាទីតាំងផ្ទះរបស់គេ នៅជាប់ក្នុង Map របស់ឡាន។ Evan បានយកឡានទៅឆែកជាមួយនឹងក្រុមហ៊ុនដើម្បីបញ្ជាក់ការពិត ហើយចុងក្រោយប៉ូលិសក៏បានឱ្យដឹងថា ឡាននេះ គឺពិតជាឡានរបស់ Evan ពិតមែន ដែលប៉ូលិសសង្ស័យថាចោរបានក្លែងបន្លំចុះបញ្ជីឡានថ្មី។ ចំណែកឯអ្នកលក់ឡាននោះ ក៏បានចាញ់បោកចោរដូចគ្នា៕

ប្រភព៖ Khaosod