សារព័ត៌មានបរទេស បានរាយការណ៍ពីករណីរិះគន់យ៉ាងចាស់ដៃមួយពីសំណាក់មហាជន ទៅកាន់បុគ្គលិកអាកាសចរ ២ រូបរបស់ជើងហោះហើរកូរ៉េខាងត្បូង ដែលបានបើកទ្វារអាសន្ននាំគ្នាទៅថតរូបលេងនៅលើស្លាបយន្តហោះ។
ហេតុការណ៍មួយនេះបានកើតឡើងនៅអាកាសយានដ្ឋានអន្តរជាតិ Cheongju របស់កូរ៉េខាងត្បូង ដែលជាជើងហោះហើរ 703 នៃក្រុមហ៊ុនអាកាសចរណ៍ Eastar Jet Airlines។ ក្នុងនោះព័ត៌មានបានឱ្យដឹងថា ជើងហោះហើរត្រូវបានពន្យារហើយចតនៅលើព្រលាន ខណៈនោះ គេបានឃើញនារីបុគ្គលិកអាកាសចរ ៣ នាក់ បានបើកទ្វារអាសន្នដើរចេញទៅថតរូបលើស្លាបឆ្វេងនៃយន្តហោះ Boeing 737 ដែលធ្វើឱ្យមហាជនឃើញហើយកើតការមិនពេញចិត្តជាខ្លាំង។
យ៉ាងណាមិញ អ្នកនាំពាក្យក្រុមហ៊ុនអាកាសចរណ៍ Eastar Jet បានឱ្យដឹងថា ខណៈជើងហោះហើរត្រូវពន្យារពេល ១ ម៉ោង ដោយសារតែព្រិលធ្លាក់ខ្លាំង ខាងក្រុមហ៊ុនក៏បានឆ្លៀតហ្វឹកហ្វឺនបុគ្គលិកបន្ថែម ហើយក៏បានអនុញ្ញាតឱ្យបុគ្គលិកបើកទ្វារអាសន្ននេះ តែមិនបានអនុញ្ញាតឱ្យថតរូបឡើយ ព្រោះតែព្រលានយន្តហោះ Cheongju ជាព្រលានរបស់យោធា ដែលមានការតឹងរ៉ឹងខ្លាំងក្នុងការថតរូបផ្សេងៗ ហើយអ្នកដែលបំពានច្បាប់អាចប្រឈមមុខនឹងការជាប់ពន្ធនាគាររហូតដល់ 3 ឆ្នាំ ឬពិន័យជាប្រាក់អតិបរមា ៣០ លានវ៉ុនឯណោះ៕
ប្រភព៖ Khaosod
