បើគិតមកដល់ពេលនេះ រយៈពេលជិត ១ ឆ្នាំហើយ ដែលលោក ប៉ាន់ ខែមម៉ានូ តួឯកប្រុសក្នុងរឿង «កូនប្រុសក្រោមពន្លឺព្រះចន្ទពេញបូណ៍មី» បានដឹកដៃភរិយារូបស្រស់ចូលរោងការតាមប្រពៃណី កាលពីថ្ងៃទី ១៩ ខែវិច្ឆិកា ឆ្នាំ ២០២៤ កន្លងទៅ។
កាលនោះ ពិធីមង្គលការរបស់តារាប្រុស ប៉ាន់ ខែមម៉ានូ និង ភរិយា បានរៀបចំឡើងយ៉ាងអធិកអធមនៅទីរួមខេត្តតាកែវ ដោយកម្មវិធីមង្គលការបានរៀបចំឡើងទៅតាមប្រពៃណីទំនៀមទម្លាប់ខ្មែរយ៉ាងខ្ជាប់ខ្ជួន សូម្បីតែសម្លៀកបំពាក់គ្រងលើកូនប្រុសស្រី ក៏សមសួន ប្រណីត ថ្លៃថ្នូរទៅតាមប្រពៃណីខ្មែរដែរ។ មិនត្រឹមតែប៉ុណ្ណោះ បើទោះជារៀបការនៅឯខេត្តក៏ពិតមែន ប៉ុន្តែមានមិត្តទាំងក្នុង ក្រៅសិល្បៈ និង តារាល្បីៗជាច្រើនបានទៅចូលរួមពិធីមង្គលការរបស់លោក និង ភរិយា។
ក្រោយរៀបការរយៈពេលជិតកន្លះឆ្នាំ លោក ប៉ាន់ ខែមម៉ានូ បានប្រកាសដំណឹងល្អជាថ្មីដល់អ្នកគាំទ្រ ដោយភរិយារបស់លោកកំពុងពពោះកូនដំបូងផងដែរ ដោយកូនក្នុងផ្ទៃរបស់ភរិយាជាទីស្រឡាញ់ គឺជាកូនប្រុស។ ក្នុងនោះដែរ បាំងតែប៉ុន្មានសប្តាហ៍ទៀតប៉ុណ្ណោះ លោក ប៉ាន់ ខែមម៉ានូ និង ភរិយា នឹងបានឃើញមុខកូនប្រុសដំបូង ដោយពេលនេះ ភរិយារបស់លោកមានផ្ទៃពោះចំនួន ៣២ សប្តាហ៍ហើយ។
ជាក់ស្តែង ភរិយាកាន់តែកៀកពេលសម្រាល លោក ប៉ាន់ ខែមម៉ានូ តែងតែបង្ហាញការយកចិត្តទុកដាក់ យល់ពីសុខទុក្ខរបស់ស្ត្រីពពោះបានយ៉ាងល្អ ដោយថ្មីៗនេះ លោក ប៉ាន់ ខែមម៉ានូ បានបង្ហោះរូបភាព និង ភ្ជាប់នូវសារមួយបង្ហាញពីការសរសើរនូវការលះបង់របស់ភរិយាថា៖ «គ្រប់ពេលតែងនៅក្បែរអូន! ដឹងច្បាស់ថាអូនពិតជាហត់នឿយ និង លះបង់ច្រេីនពេកហេីយ ដេីម្បីកូនយេីង និង អនាគតគ្រួសារយេីង»៕
