នារីម្នាក់ត្រូវក្រុមហ៊ុនដកចោល ព្រោះយកម៉ោងធ្វើការទៅទិញអីវ៉ាន់អនឡាញ ចុងក្រោយនាងប្ដឹងទារជំងឺចិត្តបានជាង ២ ម៉ឺនដុល្លារ

មានរឿងរ៉ាវរបស់ស្រ្តីជនជាតិប៉ូឡូញម្នាក់ ដែលត្រូវគេដេញចេញពីការងារ ព្រោះតែនាងយកម៉ោងធ្វើការទៅអង្គុយទិញអីវ៉ាន់តាមអនឡាញ តែចុងក្រោយនាងមិនសុខចិត្ត ប្តឹងបកទៅក្រុមហ៊ុនវិញ ទទួលបានជំងឺចិត្តរាប់ម៉ឺនដុល្លារ។

តាមព័ត៌មានបានឱ្យដឹងថា ស្រ្តីរូបនេះមានឈ្មោះថា Anna Lanuchka មានវ័យ ៣៤ ឆ្នាំ កាលពី ២ ឆ្នាំមុន នាងត្រូវក្រុមហ៊ុនដែលនាងធ្វើការ ដេញនាងចេញពីការងារ ដោយអះអាងថាគេឆែកឃើញថានាងបានប្រើម៉ោងធ្វើការ ៤៥ នាទីជារៀងរាល់ថ្ងៃ ចូលទៅវេបសាយទិញអីវ៉ាន់តាមអនឡាញ។ ក្រុមហ៊ុនបានចោទថានាងយកពេលវេលាធ្វើការទៅធ្វើរឿងផ្ទាល់ខ្លួន ដែលធ្វើឱ្យប៉ះពាល់ដល់គុណភាព និងកេរិ៍្តឈ្មោះរបស់ក្រុមហ៊ុន។

យ៉ាងណាមិញ ដោយសារតែការមិនសុខចិត្ត និងមានអារម្មណ៍ថាអយុត្តិធម៌ ទើបនាងសម្រេចចិត្តដាក់ពាក្យបណ្តឹងទៅកាន់តុលាការឱ្យជួយដោះស្រាយ។ ក្នុងនោះតុលាការជឿ កាលដែលនាងប្រើពេល ៤៥ នាទីនោះ មិនមានទម្ងន់គ្រប់គ្រាន់សម្រាប់ការបណ្តេញនាងចេញនោះទេ តាមពិតទៅ គឺក្រុមហ៊ុននេះចង់ដេញនាងចេញមុននឹងនាងបានទទួលសិទ្ធិជាបុគ្គលិកស្របច្បាប់។ ដូនេះហើយ ចុងក្រោយតុលាការក៏បានសម្រេចឱ្យក្រុមហ៊ុនសងជំងឺចិត្តទៅនាងប្រហែលជាជិត ២ ម៉ឺនដុល្លារ៕

ប្រភព៖ Khaosod