សារព័ត៌មាន ETtoday បានរាយការណ៍ពីករណីរបស់បុគ្គលិកស្រីម្នាក់នៅប្រទេសចិន ដែលត្រូវក្រុមហ៊ុនដេញចេញដោយសារតែនាងចេញពីធ្វើការមុនម៉ោងត្រឹម ១ នាទី ស្រាប់តែនាងឈឺចិត្តពេក ឡើងប្តឹងដល់តុលាការ។
តាមព័ត៌មាបានឱ្យដឹងថា នាងធ្វើការនៅក្រុមហ៊ុននេះជាង ៣ ឆ្នាំទៅហើយ នៅថ្ងៃមួយស្រាប់តែខាងធនធានមនុស្ស (HR) បានហៅនាងទៅជួប ដោយបានយករូបភាពជាច្រើននៅក្នុងកាមេរ៉ាសុវត្ថិភាព មកចោទនាងថានាងបានចេញពីធ្វើការមុនម៉ោង ១ នាទី អស់រយៈពេល ៦ ថ្ងៃ នៅក្នុងខែមួយកាលពីឆ្នាំ ២០២៤ កន្លងទៅ ដែលចុងក្រោយនាងក៏ត្រូវគេដេញចេញតាមច្បាប់របស់ក្រុមហ៊ុន។
យ៉ាងណាមិញ នារីរូបនេះកើតការមិនសុខចិត្តជាខ្លាំង ក៏បានប្តឹងទៅតុលាការឱ្យជួយដោះស្រាយ ក្នុងនោះតុលាការបានឱ្យដឹងថា តាមរយៈកាមេរ៉ាសុវត្ថិភាព នារីរូបនេះងើបពីកៅអីធ្វើការត្រឹម ១ នាទី ខណៈមុនម៉ោងបាយ និង មុនម៉ោងចេញពីធ្វើការប៉ុណ្ណោះ វាមិនសមហេតុផលដែលក្រុមហ៊ុនបញ្ឈប់នាងនោះទេ។ លើសពីនេះទៀត ខាងក្រុមហ៊ុនមិនដែលលើកបញ្ហានេះមកឱ្យនាងកែប្រែឡើយ ប៉ុន្តែស្រាប់តែបញ្ឈប់នាងតែម្តង។ តុលាការបានចាត់ទុកថា ការបណ្ដេញចេញរបស់ក្រុមហ៊ុននេះជាទង្វើមិនត្រឹមត្រូវច្បាស់លាស់ ដូច្នេះក្រុមហ៊ុនត្រូវសងសំណងដល់នារីខាងលើ៕
ប្រភព៖ Kapook
