ចង់បានលុយកុំមីស្យុងពេក ស្រីស្អាតម្នាក់ពួយទៅបោកសង្សារសរុប ៣៦ នាក់ឡើងវិលក្បុង ឱ្យទិញខុនដូរកន្លែងតែមួយ

ថ្មីៗនេះ សារព័ត៌មាន World of Buzz បានរាយការណ៍ពីករណីដ៏គួរឱ្យហួសចិត្តមួយនៅប្រទេសចិន ដែលមាននារីជាភ្នាក់ងារអចលនទ្រព្យម្នាក់ ចេញក្បាច់បោកសង្សារ ៣៦ នាក់ឱ្យទិញខុនដូរកន្លែងតែមួយ ដើម្បីនាងបានលុយ Commission (កម្រៃជើងសារ) ។

តាមព័ត៌មានបានឱ្យដឹងថា​ នារីរូបនេះមានឈ្មោះថា Liu Jia។ ចំណែកបុរសៗទាំងអស់ដែលចាញ់បោកនាង ភាគច្រើនមានអាយុខ្ទង់ ៣០ ឆ្នាំ ដោយពួកគេបានជួបនាងនៅលើ App រកដៃគូ ហើយពួកគេម្នាក់ៗក៏លង់ស្រឡាញ់នាងយ៉ាងលឿន រួចក៏បាននិយាយរឿងរៀបការជាមួយគ្នាទៀតផង។ មនុស្សប្រុសទាំងនោះបានឱ្យដឹងទៀតថា ក្រោយមក Liu Jia បានណែនាំឱ្យពួកគេទិញខុនដូរ ដែលមានទីតាំងស្ថិតទីក្រុង Huizhou ដោយនាងបានអះអាងបើព្រមទិញ នោះនាងនឹងយល់ព្រមរៀបការជាមួយ។ លើសពីនេះទៀត នាងសុខចិត្តដកលុយនាងទៅកក់គេមុនឱ្យទៀតផង ដោយការទិញនេះ គឺជាការបង់រំលោះជាមួយគ្នា។

យ៉ាងណាមិញ នៅពេលដែលពួកគេព្រមចុះកិច្ចសន្យាទិញ  Liu Jia មិនដាក់ឈ្មោះនាងក្នុងកិច្ចសន្យានោះឡើយ ហើយពេលដែលធ្វើកិច្ចសន្យាទិញរួច Liu Jia បានព្រងើយកន្តើយដាក់ពួកគេ រួចក៏បាត់ខ្លួនតែម្តង។ ដោយឡែក បុរសៗទាំងនោះសរុប ៣៦ នាក់ បានយករឿងនេះទៅប្តឹងខាងខុនដូរ ទើបដឹងថាសង្សាររបស់ពួកគេដែលណែនាំឱ្យទិញខុនដូរនេះ គឺមានឈ្មោះតែមួយ ហើយទើបរឹតតែដឹងខ្លួនច្បាស់ទៀតថា ពួកគេត្រូវបាននាងបោកប្រាស់ដូចគ្នា៕

ប្រភព៖ Kapook