កាលពីថ្ងៃទី ១៥ ខែមករា ឆ្នាំ ២០២៥ កន្លងទៅនេះ ទីស្នាក់ការប៉ូលិសស៊ើបអង្កេតឧក្រិដ្ឋកម្មបច្ចេកទេសរបស់ថៃ បានទម្លាយឱ្យដឹងពីករណីដែលលោកស្រីនាយករដ្ឋមន្រ្តី Pae Thongthan Shinawatra ត្រូវបានក្រុមជនឆបោកអនឡាញព្យាយាមបោកប្រាស់តាមរយៈខ្សែទូរស័ព្ទ។
តាមព័ត៌មានបានឱ្យដឹងថា ក្រុមជនឆបោកបានប្រើបច្ចេកវិទ្យា AI បន្លំធ្វើជាសំឡេងរបស់មេដឹកនាំក្រៅប្រទេស ហើយបានខលមកសុំឱ្យលោកស្រីនាយករដ្ឋមន្រ្តីបរិច្ចាគលុយទៅកាន់ពួកគេ។ យ៉ាងណាមិញ លោកស្រីក្រោយពីកើតហេតុ លោកស្រីនាយករដ្ឋមន្រ្តី បានចាត់ឱ្យលោក Prasert Jantarawongthong ជាឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងសង្គមឌីជីថល (DE) ជាអ្នកចាត់វិធានការទៅលើរឿងនេះ។
ដោយឡែក ខាងប៉ូលិសបច្ចេកវិទ្យានឹងសហការសម្របសម្រួលជាមួយលោកឧបនាយករដ្ឋមន្ត្រី ដើម្បីធ្វើការទៅលើរឿងនេះថែមទៀត ព្រោះតែធ្លាប់មានព័ត៌មានមួយពីជនបោកប្រាស់រួចមកហើយ ដោយក្រុមពួកនេះតែងតែបោកប្រាស់ប្រជាជនដោយការក្លែងបន្លំប្រើសំឡេង AI ៕
ប្រភព៖ Khaosod
