ជាតួអង្គបែប Animate មែនពិត ប៉ុន្តែក្រុមនារី HUNTR/X នៅក្នុងរឿង K-Pop Demon Hunters បានឆក់យកបេះដូងអ្នកទស្សនាមិនតិចឡើយ។ ជាក់ស្តែង រឿងនេះចេញបានតែពីរថ្ងៃ វាបានហក់ឡើងទៅលំដាប់ទី ១ លើពិភពលោក។
នៅក្នុងសាច់រឿង ក្រុមនារី HUNTR/X មានសមាជិក ៣ នាក់ គឺ Rumi, Mira, និង Zoey ដែលពួកគេជាអ្នកប្រមាញ់បិសាចដោយសម្ងាត់ ហើយព្យាយាមនាំមកនូវសន្តិភាព និង ភាពសុខដុមរមនាដល់ពិភពលោកជាមួយនឹងតន្ត្រីរបស់ពួកគេ។ កំពុងជាប់ចិត្តនឹងតួអង្គ មោះ! យើងសូមបង្វែរអារម្មណ៍ប្រិយមិត្ត មកស្គាល់អ្នកបញ្ចូលសំឡេងនៃតួអង្គទាំង ៣ វិញម្តង។
១. តួអង្គ Rumi បញ្ចូលសំឡេងដោយ Arden Cho និង ច្រៀងដោយ EJAE
តួអង្គ Rumi គឺជាមេក្រុមនៃ HUNTR/X ជាតួដែលមានទំនុកចិត្តខ្ពស់ មិនភ័យខ្លាច និង មានមន្តស្នេហ៍ ។ នាងត្រូវបានបញ្ចូលសំឡេងដោយតារាសម្តែង Arden Cho ដែលមានភាពល្បីល្បាញតាមរយៈការសម្តែងជាតួ Kira Yukimura នៅក្នុងរឿង Teen Wolf។ នាងក៏ធ្លាប់សម្តែងនៅក្នុងរឿង Chicago Med, Stuck, The Honor List និង រឿងជាច្រើនទៀតផងដែរ។
ចំណែក អ្នកច្រៀងសម្រាប់តួអង្គ Rumi គឺ EJAE ដែលជាអ្នកចម្រៀង និង និពន្ធចម្រៀង ដែលធ្វើការជាមួយក្រុមចម្រៀងល្បីៗដូចជា Red Velvet, NMIXX, LE SSERAFIM និង aespa។
២. តួអង្គ Mira បញ្ចូលសំឡេងដោយ May Hong និង ច្រៀងដោយ Audrey Nuna
តួអង្គ Mira គឺជាអ្នកដឹកនាំរាំនៃក្រុម HUNTR/X។ នាងត្រូវបានបញ្ចូលសំឡេងដោយ តារាម៉ូឌែល និង ជាតារាសម្តែង មានសញ្ជាតិ កូរ៉េ-អាមេរិក May Hong។ នៅក្នុងអាជីពម៉ូឌែល នាងបានដើរបង្ហាញម៉ូដឱ្យអ្នកច្នៃម៉ូដល្បីៗលំដាប់អន្តរជាតិដូចជា Eckhaus Latta, Marc Jacobs និង Gucci ជាដើម។ នាងបានសម្តែងនៅក្នុងរឿងមួយចំនួនរួមមាន High Maintenance, Hacks និង Tales of the City។
ក្រឡេកមកអ្នកច្រៀងឱ្យតួអង្គ Mira វិញ គឺ Audrey Chu ដែលនាងជាតារាចម្រៀង R&B និង រ៉េប។ នៅលើឆាកតន្ត្រីនាងត្រូវបានគេស្គាល់ឈ្មោះថា Audrey Nuna។
៣. តួអង្គ Zoey បញ្ចូលសំឡេងដោយ Ji-young Yoo និង ច្រៀងដោយ Rei Ami
តួអង្គ Zoey គឺជាអ្នករ៉េប និង និពន្ធបទភ្លេងនៅក្នុងក្រុម HUNTR/X។ ហើយនាងជាកូនពៅ ដែលក្មេងជាងគេក្នុងចំណោមសមាជិកទាំង ៣។ តួអង្គ Zoey ត្រូវបានបញ្ចូលសំឡេងដោយតារាសម្តែងស្រីសញ្ជាតិអាមេរិក SunHee Seo ដែលគេស្គាល់ឈ្មោះនៅក្នុងអាជីព Ji-young Yoo។ នាងបានបង្ហាញខ្លួនជាលើកដំបូងក្នុងឆ្នាំ ២០២១ ជាមួយនឹងខ្សែភាពយន្តបែបកំប្លែងនៅលើ Netflix ចំណងជើង Moxie។ បន្ទាប់មក នាងបានលេចមុខសម្តែងនៅក្នុងភាពយន្តមួយចំនួនទៀត រួមមាន Expats, Smoking Tigers និង Until Dawn។ នាងថែមទាំងបានបញ្ចូលសំឡេងជាភាសាអង់គ្លេស សម្រាប់តួអង្គ Eun-yu នៅក្នុងរឿងកូរ៉េ Sweet Home រដូវកាលទី ១។
ចំពោះអ្នកច្រៀងសម្រាប់តួអង្គ Zoey វិញ នាងឈ្មោះ Sarah Yeeun Lee កើតនៅសេអ៊ូល មានសញ្ជាតិអាមេរិក ជាអ្នកចម្រៀង និង រ៉េប។ នាងត្រូវបានគេស្គាល់ឈ្មោះនៅក្នុងអាជីព Rei Ami។ នាងបានចេញអាល់ប៊ុមស្ទូឌីយ៉ូចម្រៀងដំបូងឈ្មោះថា Foil នៅក្នុងឆ្នាំ ២០២១។ បទចំណងជើង Freak ដែលនាងច្រៀងរួមគ្នាជាមួយ Sub Urban បានផ្ទុះខ្លាំងនៅលើបណ្តាញសង្គម TikTok៕
ប្រភព៖ Prestige HK
