កាលពីថ្ងៃទី ២១ ខែកក្កដា ឆ្នាំ ២០២៥ កន្លងទៅនេះ Sommai ជាអតីតទាហានល្បាតថៃ ដែលលួចវាយទាហានខ្មែរនៅប្រាសាទតាមាន់ធំកាលពីពេលកន្លងទៅ ត្រូវតុលាការកាត់ទោសឱ្យជាប់គុក ១៥ ថ្ងៃ ប៉ុន្តែមានការព្យួរទោសឱ្យ ១ ឆ្នាំ បើក្នុងរយៈពេល ១ ឆ្នាំនេះមិនធ្វើខុសទៀត នោះមិនបាច់ត្រូវជាប់គុកនោះទេ។
ក្នុងនោះ បន្ទាប់ពីបង្កហេតុរួច ខាងភាគីថៃបានអះអាងថានឹងយកជនបង្ករូបនេះទៅដាក់ទោសតាមផ្លូវច្បាប់ ដោយចោទប្រកាន់ពីបទការវាយដំលើរាងកាយ ដោយមិនបង្កគ្រោះថ្នាក់ដល់រាងកាយ ឬផ្លូវចិត្ត និង គ្មានបណ្តឹងបន្ថែមពីជនរងគ្រោះ។ ដោយឡែក ក្រោយមកខាងសាលក្រមរបស់តុលាការប្រទេសថៃ បានកាត់ក្តីឱ្យជនបង្កជាប់ពន្ធនាគារចំនួន ១ ខែ និង ពិន័យជាប្រាក់ ៥០០០ បាត តែដោយសារតែជនបង្កទទួលសារភាព ទើបទោសនៅសល់មកត្រឹមចំនួន ១៥ ថ្ងៃ និង ពិន័យជាប្រាក់ ២៥០០ បាត ប៉ុន្តែតុលាការបានឱ្យករណីពិសេសមួយទៀត គឺព្យួរទោសឱ្យជនបង្កចំនួន ១ ឆ្នាំ មានន័យថាបើក្នុង ១ ឆ្នាំនេះ ជនបង្កមិនបានបង្ករឿងណាមួយទៀត នោះគេនឹងរួចខ្លួន ដោយមិនចាំបាច់ជាប់ពន្ធនាគារចំនួន ១៥ ថ្ងៃនោះឡើយ។
យ៉ាងណាមិញ ប្រាក់ពិន័យរបស់ជនបង្ករូបនេះ មានអ្នកចេញឱ្យរួចរាល់ ហើយមើលទៅគឺដូចមុនដដែល គឺប្រជាជនថៃហាក់ពេញចិត្តចំពោះទង្វើដ៏អសីលធម៌របស់ជនបង្ករូបនេះ ដោយនៅតែលើកថាជាអ្នកក្លាហានស្នេហាទឹកដី។ ដោយឡែក បន្ទាប់ពីបានរួចខ្លួន ជនបង្កក៏បានបោះសម្តីថា ខ្លួនធ្វើបែបនេះព្រោះតែស្រឡាញ់ទឹកដី ហើយក៏មិនបានរត់ដែរ តែវាគឺជាជ័យជម្នះ ទាហានព្រៃវាយលឿន ឈ្នះលឿន ដកខ្លួនលឿនបែបនេះឯង៕
ប្រភព៖ Thairath
