ធ្វើដើម្បីកម្ពុជារីកចម្រើន! ផលិតកម្មបារមី ប្រកាសដល់ម្ចាស់ម៉ាកយីហោខ្មែរថ្មីថ្មោង ចង់ផ្សព្វផ្សាយផលិតផលខ្លួន អាចទាក់ទងតាមរយៈនេះ

បើនិយាយពីផលិតផលក្នុងស្រុកនាពេលនេះវិញ កំពុងតែទទួលបានការគាំទ្រពីសំណាក់ប្រជាជនកម្ពុជា បើទោះជាការផលិតមិនទាន់សម្បូរបែបក៏ពិតមែន ប៉ុន្តែនៅលើទីផ្សារនាពេលនេះ ផលិតផលក្នុងស្រុក រួមមានផលិតផលប្រើប្រាស់ប្រចាំថ្ងៃ ចំណីអាហារ ក៏ដូចជាប្រភេទគ្រឿងសំណង់មួយចំនួន ក៏កំពុងចរាចរក្នុងទីផ្សារផងដែរ។

ស្របគ្នាទីផ្សារផលិតផលក្នុងស្រុកកំពុងតែដំណើរការនោះ ការផ្សព្វផ្សាយក៏ជាផ្នែកដ៏សំខាន់ដូចគ្នាដែរ ដោយចំណុចនេះ ត្រូវបានសិល្បករ សិល្បការិនីជាច្រើនបានប្រកាសចូលរួមផ្សព្វផ្សាយផលិតផលក្នុងស្រុក ដោយមិនគិតថ្លៃសម្រាប់បណ្តាក្រុមហ៊ុន និង ផលិតផលរបស់កម្ពុជា។

ក្នុងនោះដែរ ផលិតកម្មបារមី ដែលត្រូវបានចាត់ទុកជាផលិតកម្មមានសក្តានុពលក្នុងវិស័យតន្ត្រី និង ការផលិតចម្រៀងដ៏សម្បូរបែបនោះ ក៏បានប្រកាសនឹងសិក្សាពីអាជីវកម្មក្នុងស្រុក កំពុងបង្កើតផលិតផលខ្មែរ ដើម្បីបានចូលរួមជួយផ្សព្វផ្សាយ និង ចែករំលែកប្រ៊េនខ្មែរជាសកលទៀតផង។

តាមរយៈផេកផ្លូវការរបស់ផលិតកម្មបារមី បានឱ្យដឹងថា៖ «ជម្រាបសួរ ពុកម៉ែបងប្អូនទាំងអស់គ្នា! កន្លងពេលថ្មីៗមកនេះ ពួកយើងបានទទួលសារជាច្រើនពីអាជីវកម្មក្នុងស្រុកមួយចំនួន ដែលកំពុងបង្កើតផលិតផលខ្មែរ សម្រាប់តម្រូវការក្នុងស្រុករបស់ប្រជាជនយើង។ សកម្មភាពទាំងនេះ បានបំផុសគំនិត ពួកយើងយ៉ាងខ្លាំង ហើយផលិតកម្មបារមី ពិតជាចង់ស្វែងរកវិធី ដើម្បីជួយផ្សព្វផ្សាយ និង ចែករំលែកផលិតផល ម៉ាកយីហោរបស់ខ្មែរក្នុងគ្រាដ៏លំបាកនេះ។ ជាជំហានដំបូង ពួកយើងកំពុងចាប់ផ្តើមគម្រោងនេះ តាមរយៈការសិក្សា និង ស្វែងយល់ពីសហគមន៍ឱ្យបានកាន់តែច្បាស់ និង ពិនិត្យមើលថា តើយើងអាចជួយផ្សព្វផ្សាយផលិតផលខ្មែរបានយ៉ាងដូចម្តេចខ្លះ? ប្រសិនបើពុកម៉ែបងប្អូន ជាម្ចាស់អាជីវកម្ម ឬម៉ាកយីហោខ្មែរណាមួយ ដែលទើបនឹងបង្កើតថ្មី ពុកម៉ែបងប្អូនអាចចែករំលែកព័ត៌មានផលិតផលរបស់អ្នកមកកាន់ពួកយើងតាមរយៈ teamcambodia@barameyproduction.com។ តោះកម្ពុជា នេះគឺជា Time to Rise របស់យើងហើយ!»៕