បន្ទាប់ពីទាហានរបស់ខ្លួនចំនួន ៣ នាក់ បានរងរបួសដោយសារតែការជាន់មីនៅតំបន់មុំបី កាលពីថ្ងៃទី ១៦ ខែកក្កដា ឆ្នាំ ២០២៥ កន្លងទៅ ពេលនេះលោក Boonsin Padklang មេទ័ពភូមិភាគ ២ បានបោះសម្តីថ្មីទៀតហើយ ដោយនិយាយថាលែងឱក្យកូនចៅថ្មើរជើងល្បាតទៀតហើយ គឺម្តងនេះប្រើត្រាក់ទ័រទៅឈូសឆាយម្តង។
នៅថ្ងៃទី ២២ ខែកក្កដា ឆ្នាំ ២០២៥ នេះ មេទ័ពភូមិភាគ ២ បានបកស្រាយចំពោះមុខប្រជាជនថា ខ្លួនមិនព្រងើយកន្តើយចំពោះករណីទាហានជាន់មីននោះទេ បើទោះជាកម្ពុជាអះអាងថាមិនបានដាក់ក៏ដោយ តែគួរតែដឹងហើយថាកម្ពុជាជាប្រទេសយ៉ាងណា មើលទៅកំពុងតែព្យាយាមរករួចខ្លួន ព្រោះបើក្រសួងការបរទេសថៃរករឿងមែនទែននោះ វានឹងធ្វើឱ្យខូចកិត្តិយសកេរិ៍្តឈ្មោះប្រទេសកម្ពុជា ដូចនេះហើយទើបវាជាតួនាទីរបស់ក្រសួងការបរទេស។
លោក Boonsin Padklang បានបន្តទៀតថា លោកនឹងលែងឱ្យមានការល្បាតដូចដើមហើយ គឺប្រើត្រាក់ទ័រឈូសឆាយម្តង ហើយក៏នឹងត្រួតពិនិត្យតំបន់ផ្សេងៗដែរថាមានមីន ឬក៏អត់។ លើសពីនេះទៀត លោក Boonsin ក៏បានទម្លាយពីការធ្វើផ្លូវនៅតំបន់ជាយដែន ដើម្បីបញ្ជូនគ្រឿងផ្គត់ផ្គង់ឱ្យទាហាន និង ងាយស្រួលឱ្យទាហានចេញល្បាត តែក៏នៅតែមិនទាន់ដឹងថាមានមីននៅកន្លែងណាខ្លះទេ ហើយក៏មិនទាន់ដឹងថាវាជោគជ័យឬយ៉ាងណាដែរ គឺអាស្រ័យលើមេដឹកនាំទាំងពីរប្រទេស ជាពិសេសគឺមេដឹកនាំកម្ពុជា ថាតើនិយាយគ្នាដើម្បីដោះស្រាយបញ្ហានេះបានឬទេ៕
ប្រភព៖ CH7
