ធ្វើជាកូនសេដ្ឋីមានសម្ពាធពេក បុរសចិនម្នាក់កាត់កាលឪពុកម្ដាយចោល ទៅរស់នៅតែលតោលតាមផ្លូវ ព្រោះស្រួលចិត្តជាង

កាលពីថ្មីៗកន្លងទៅ សារព័ត៌មានក្រៅស្រុកមួយបានចុះផ្សាយពីជីវិតរបស់បុរសជនជាតិចិនម្នាក់ ដែលបានកាត់កាលឪពុកម្តាយជាសេដ្ឋីចោល ហើយទៅរស់នៅតែលតោលតាមផ្លូវ ដោយអះអាងថាជីវិតបែបនេះស្រួលជាង គ្មានសម្ពាធអ្វីទាំងអស់។

តាមព័ត៌មានបានឱ្យដឹងថា បុរសខាងលើនេះមានឈ្មោះថា Zhao Dian វ័យ ៣២ ឆ្នាំ។ គេបានចេញទៅរស់នៅឯប្រទេសស្វីសតាំងពី ១០ ឆ្នាំ ហើយរៀននៅទីនោះរហូតទាល់តែបានបញ្ចប់បរិញ្ញាបត្រពីរ​ និងអនុបណ្ឌិតមួយ ក្នុងផ្នែកហិរញ្ញវត្ថុ។ ដោយឡែក ដ្បិតតែកើតក្នុងត្រកូលសេដ្ឋីពិតមែន តែបុរសនេះមិនដែលទទួលការស្រឡាញ់ពីឪពុកម្តាយនោះទេ ជារឿយៗគេតែងតែទទួលការស្តីបន្ទោស និងការដាក់សម្ពាធតាំងតែពីក្មេងមក រហូតមកដល់ឆ្នាំ ២០២៤ កន្លងទៅ ក៏បានសម្រេចចិត្តមកប្រទេសចិនវិញ ហើយមករស់នៅជាមនុស្សតែលតោលតាមផ្លូវនាទីក្រុង។

Zhao Dian ចាយលុយក្នុងមួយខែតែ ១០០ យ័ន ឬត្រឹម ១៥ ដុល្លារប៉ុណ្ណោះ ហើយគេតែងតែស្វែងរកអាហារដែលឥតគិតថ្លៃនៅតាមហាងអាហារបួស ព្រមទាំងងូតទឹក និងបោកខោអាវនៅកន្លែងស្នាក់នៅ Hostel តូចៗ។ Zhao Dian តែងចំណាយពេលវេលាអានសៀវភៅ ធ្វើដំណើរ និងផ្តល់ការប្រឹក្សាសុខភាពផ្លូវចិត្តតាមអនឡាញ។ ដោយឡែក មានមហាជនខ្លះបានអាណិតអាសូរ តែអ្នកខ្លះទៀតក៏បានចោទថា Zhao Dian មិនមានទំនួលខុសត្រូវជាមួយគ្រួសារ និងឪពុកម្តាយ៕