ពិតជាគួរឱ្យសោកស្តាយ អ្នកច្នៃម៉ូដដ៏ល្បីឈ្មោះ និង ជាមហាសេដ្ឋីក្នុងពិភពហ្វេហ្សិន លោក Giorgio Armani បានទទួលមរណភាពក្នុងអាយុ ៩១ ឆ្នាំ។ ជាក់ស្តែង បើតាមក្រុមហ៊ុនហ្វេហ្សិនដ៏ល្បីលំដាប់សកល Armani ប្រកាស លោកបានទទួលមរណភាពកាលពីថ្ងៃ ព្រហស្បតិ៍ ម្សិលមិញនេះ។
បើតាមការចុះផ្សាយ ម្ចាស់ប្រ៊េន លោក Giorgio Armani ហាក់មិនស្រួលខ្លួននៅមួយរយៈចុងក្រោយ ដោយលោកបានផ្អាកការចូលរួមក្នុងព្រឹត្តិការណ៍បង្ហាញម៉ូដ Milan’s Men’s Fashion Week កាលពីខែមិថុនា ខណៈវត្តមានចុងក្រោយរបស់លោក គឺនៅថ្ងៃទី ២១ ខែឧសភានេះ។
លោក Giorgio Armani គឺជាគំរូនៃរចនាបថស្ទីលអ៊ីតាលី និង អេឡេហ្គង់ ដែលបានរំលេចនូវសម្លៀកបំពាក់បុរសនារី សម្រាប់សម័យទំនើប។ លោកបានផ្តើមអាជីពដំបូងខាងផ្នែកវេជ្ជសាស្ត្រ តែក្រោយមកបានបោះជំហានចូលក្នុងពិភពហ្វេហ្សិននៅក្នុងឆ្នាំ ១៩៦០ និង បានបង្កើតម៉ាកយីហោប្រណីត Armani ដែលយើងឃើញសព្វថ្ងៃនៅក្នុងឆ្នាំ ១៩៧៥ ជាមួយសហស្ថាបនិកគឺ លោក Sergio Galeotti។
មកដល់បច្ចុប្បន្ន លោកបានពង្រីកអាណាចក្ររបស់ខ្លួនប្រកបដោយវិសាលភាពទៅក្នុងវិស័យផ្សេងៗ រាប់តាំងពី ហ្វេហ្សិន សម្រស់ ទឹកអប់ តន្ត្រី កីឡា រហូតដល់ សណ្ឋាគារប្រណីត ដែលរកបានចំណូលខ្ទង់ជាង ២ ពាន់លានផោនក្នុងមួយឆ្នាំ។ មរណភាពរបស់លោក ត្រូវបានគេចាត់ទុកជាការបាត់បង់ធនធានដ៏មានកិត្តិនាម មានស្នាដៃល្អឯក ចារជាប្រវត្តិសាស្ត្ររបស់ពិភពលោក៕
