នៅថ្ងៃទី ១៤ ខែសីហា ឆ្នាំ ២០២៥ នេះ មេទ័ពភូមិភាគ ២ ថៃ Boonsin Padklang បានចុះទៅជជែកសំណេះសំណាលជាមួយនឹងនិស្សិតនៅសកលវិទ្យាល័យ Kasetsart ទាក់ទងនឹងបញ្ហាព្រំដែនកម្ពុជា-ថៃ។
Boonsin Padklang បានរៀបរាប់ប្រាប់និស្សិតទាំងអស់យ៉ាងមានមោទកភាពថា ខ្លួនបានខិតខំប្រឹងប្រែងការពារទឹកដីរបស់ដូនតាខ្លាំងណាស់ អ្នកណាឈ្លានពានត្រូវតែរុញចេញឱ្យឆ្ងាយ តែមិនឈ្លានពានប្រទេសណាមុនឡើយ ការប្រយុទ្ធទាំងឡាយគឺកើតឡើងក្នុងទឹកដីថៃ។ Boonsin បានរៀបរាប់ទៀតថា ព្រះមហាក្សត្ររបស់ខ្លួន មានការខ្វាយខ្វល់ពីរឿងជាយដែននេះណាស់ ទ្រង់ឱ្យក្រុមកាងារមកសួរមេទ័ពជារៀងរាល់ថ្ងៃ ហើយមេទ័ពក៏បានរាយការណ៍ទៅវិញរាល់ថ្ងៃដូចគ្នា។
Boonsin បានបន្តទៀតថា នេះគឺជាកងកម្លាំងរបស់ទ័ពថៃយ៉ាងពិតប្រាកដណាស់ កាលពីក្នុងប្រវត្តិសាស្រ្តសម័យដើមព្រះមហាក្សត្រដឹកនាំកងទ័ព ហើយបច្ចុប្បន្ននេះក៏នៅតែដូចដើម ដូច្នេះហើយទាហានគ្រប់គ្នាគឺត្រៀមលះបង់ជីវិតដើម្បីប្រទេសជាតិគ្រប់គ្នា។ ក្នុងស្ថានការណ៍បែបណាក៏ដោយ ទាហានបានត្រៀមរួចហើយ មិនថាត្រៀមប្រយុទ្ធបន្ត ឬឈប់បាញ់នោះទេ ពោលគឺនៅឈរជាប់នៅជួរមុខជានិច្ច៕
ប្រភព៖ Khaosod
