និយាយដល់ បុរី ប៉េងហួត មហាជនទូទៅប្រាកដជាស្គាល់ច្បាស់ ដោយសារបុរីនេះ ជាក្រុមហ៊ុនអភិវឌ្ឍន៍អចលនទ្រព្យលំដាប់ថ្នាក់ខ្ពស់មួយនៅក្នុងប្រទេសកម្ពុជា។ បើនិយាយពីស្ថាបនិកក្រុមហ៊ុននេះវិញ អាចថាមហាជនមួយចំនួននៅមិនទាន់បានស្គាល់នោះឡើយ។ ជាការពិតណាស់ ស្ថាបនិកក្រុមហ៊ុនអចលនទ្រព្យដ៏មានវិសាលភាពនេះ គឺ អ្នកឧកញ៉ា ថៃ ជាហួត។
អ្នកឧកញ៉ា ថៃ ជាហួត កើតក្នុងឆ្នាំ ១៩៧០ នៅខេត្តកំពង់ចាម ហើយលោកបានចូលប្រឡូកក្នុងវិស័យជំនួញតាំងពីទសវត្សរ៍ឆ្នាំ ១៩៩០ មកម៉្លេះ។ អ្នកឧកញ៉ា ថៃ ជាហួត ក៏មានតួនាទីជាអនុប្រធានសមាគមឧកញ៉ាកម្ពុជាផងដែរ។ ចំពោះក្រុមហ៊ុន ប៉េង ហួត គ្រុប (Peng Hout Group) អ្នកឧកញ៉ា គឺជាស្ថាបនិក និង ជាប្រធានក្រុមប្រឹក្សាភិបាល ដែលបានបង្កើតឡើងតាំងពីឆ្នាំ ២០០៥ ហើយជាក្រុមហ៊ុនកំពូលមួយក្នុងចំណោមក្រុមហ៊ុនកំពូលមួយចំនួនតូច ដែលមានជំនាញខ្ពស់ក្នុងការរចនា និង អភិវឌ្ឍន៍បុរីលំនៅដ្ឋាន, អគារខុនដូ, គម្រោងផ្សារទំនើប, អគារការិយាល័យ, អគារសន្និបាត ពិព័រណ៍ និង ពិធីរៀបអាពាហ៍ពិពាហ៍, សួនកម្សាន្តបែបអឺរ៉ុប និង សណ្ឋាគារផងដែរ។
អាជីវកម្មធំៗរបស់ក្រុមហ៊ុន ប៉េង ហួត គ្រុប មានដូចជា៖ ១. ក្រុមហ៊ុន ភីអេច ប្រូភើធី (PH Property), ២.ក្រុមហ៊ុន ភីអេច ខនស្ត្រាក់សិន (PH Construction), ៣.ក្រុមហ៊ុន ភីអេច រីថេល (PH Retail), និង ៤.ក្រុមហ៊ុនគ្រប់គ្រងបុរី (Facility Management)។ ក្រុមហ៊ុន ប៉េង ហួត គ្រុប គ្រប់គ្រងគម្រោងបូរីជាង ៣០ ក្នុងតំបន់ដ៏មានសក្តានុពលនៃរាជធានីភ្នំពេញ។ យោងលើការរចនា គុណភាពសាងសង់ បរិស្ថានក្នុងគម្រោង ក៏ដូចជាសេវាគ្រប់គ្រង ថែទាំ និង សន្តិសុខ បានធ្វើឱ្យក្រុមហ៊ុន ប៉េង ហួត គ្រុប ទទួលបាននូវពានរង្វាន់ជាច្រើនជាបន្តបន្ទាប់ក្នុងការអភិវឌ្ឍន៍វិស័យ អចលនទ្រព្យ និង សំណង់នៅកម្ពុជា។
ក្រៅពីនេះ ក្រុមហ៊ុនក៏បានចូលរួមក្នុងការងារសង្គម និង ការងារមនុស្សធម៌ជាច្រើនថែមទៀត រហូតត្រូវបានទទួលស្គាល់ពីសំណាក់សាធារណជន និង រាជរដ្ឋាភិបាល។ អ្នកឧកញ៉ា ថៃ ជាហួត បានទទួលនូវគ្រឿងឥស្សរិយយសជាច្រើន ពីសំណាក់រាជរដ្ឋាភិបាលកម្ពុជា និង ជាពិសេសគ្រឿងឥស្សរិយយសថ្នាក់កំពូល “ជាតូបការ” ពីព្រះមហាក្សត្រនៃព្រះរាជាណាចក្រកម្ពុជាផងដែរ៕
