មហាជនអ្នកប្រើប្រាស់បណ្ដាញសង្គម បាននាំគ្នាអស់សំណើចសម្ដែងក្ដីហួសចិត្ត និង ចែករំលែកបន្តគ្នាព្រោងព្រាត បន្ទាប់ពីនារីម្នាក់បានបង្ហោះពីករណីដែលខ្លួនជួបប្រទះ ដែលបានកម្មង់ទំនិញប្រភេទកាបូបពីកម្មវិធីចិន Taobao តែពេលដឹកជញ្ជូនមកដល់ដៃ ទើបដឹងថាជាថូផ្កាមានរូបរាងជាកាបូបទៅវិញ។
ទាក់ទិនទៅនឹងរឿងរ៉ាវដ៏ហួសចិត្ត និង គួរឱ្យអស់សំណើចនេះ តាមរយៈគណនីនារីម្នាក់ដែលមានឈ្មោះ Bella Nich បានបង្ហោះនៅថ្ងៃទី ២៦ ខែឧសភា ឆ្នាំ ២០២៥ កន្លងទៅ ដោយបបង្ហាញរូបភាពទំនិញកាបូបដែលខ្លួនកម្មង់ទិញ និង វីដេអូកាបូបថូផ្កាដែលខ្លួនទទួលបាន មានតម្លៃជិត ៣០$ និង បញ្ជាក់ថា ឃើញអីវ៉ាន់មកដល់ខំប្រញាប់ទៅយកទាំងសប្បាយចិត្ត ដែលទទួលបានកាបូប និង ពណ៌ដែលខ្លួនស្រឡាញ់ ស្រាប់តែបើកមកបែរជាថូផ្កាមានរូបរាងជាកាបូបទៅវិញ។
ជុំវិញការបង្ហោះនេះ មានអ្នកប្រើប្រាស់បណ្ដាញសង្គមជាច្រើនបាននាំគ្នាចូលទៅបញ្ចេញមតិចែករំលែករឿងរ៉ាវរបស់ខ្លួន ដែលមានលក្ខណៈស្រដៀងគ្នា ខណៈនេះជាមេរៀនសម្រាប់ប្រិយមិត្តដែលកម្មង់ទំនិញពី Taobao ឬ វេបសាយផ្សេងៗ គប្បីមើល Feedback ឱ្យបានច្បាស់លាស់ និង បកប្រែការបរិយាយមុខទំនិញឱ្យបានត្រឹមត្រូវជាមុនសិន៕
