ជាង ២០ ឆ្នាំមុនធ្លាប់ជ្រកក្រោមទ្រនំរួមគ្នា ហេង ពិទូ និង សាន រ័ត្នបញ្ញាស័ក្ត នៅតែមានចិត្តគំនិតនេះចំពោះគ្នាមិនប្រួលប្រែ

បើរំឮកកាលពីប្រមាណជាង ២០ ឆ្នាំមុន មហាជននិយមស្តាប់បទចម្រៀងល្បីៗ និង ផលិតកម្មល្បីៗខ្លះអាចនៅចាំនៅឡើយ ផលិតកម្ម ស៉្បាក (Spark) ដែលកាលនោះមានតារាចម្រៀងល្បីៗជាច្រើនជ្រកក្រោមទ្រនំនោះ រួមមាន លោក ឃុំ ប៉ុណ្ណាដែត, អ្នកនាង ឱក សុគន្ធកញ្ញា, អ្នកនាង សុគន្ធ និសា, លោក ហេង ពិទូ, លោក វណ្ណា ពិសិដ្ឋ, លោក កង ពិសិដ្ឋ, អ្នកនាង វ៉ាឌី ភាលីង, លោក នៅ ស៊ីនឿន និង លោក សាន រ័ត្នបញ្ញាសក្តិ ជាដើម។

យ៉ាងណាមិញ មកដល់បច្ចុប្បន្ននេះ ផលិតកម្មធ្លាប់ល្បីឈ្មោះខាងលើក៏បានបិទអស់រយៈពេលជាង ១៥ ឆ្នាំទៅហើយ ដោយក្នុងនោះ តារាចម្រៀងជ្រកក្រោមទ្រនំផលិតកម្ម Spark ភាគច្រើន ក៏នៅតែបន្តអាជីពលើវិថីសិល្បៈដូចដើម។

ដោយឡែក ក្នុងចំណោមអតីតតារាចម្រៀងផលិតកម្ម Spark គឺមានតែលោក សាន រ័ត្នបញ្ញាសក្តិ ម្ចាស់បទ «សមុទ្រស្ងប់ខ្យល់» តែម្នាក់ប៉ុណ្ណោះ ដែលរយាលខ្លាំងលើវិស័យចម្រៀង ដោយលោកបានសំងំសាងជីវិតឯកជនយ៉ាងស្ងប់ស្ងាត់។ តែយ៉ាងណាក៏ដោយ ប៉ុន្មានឆ្នាំចុងក្រោយនេះ លោក សាន រ័ត្នបញ្ញាសក្តិ ក៏បានវិលត្រឡប់មកកាន់វិថីសិល្បៈវិញដែរ ដោយលោកតែងបង្ហាញវត្តមានក្នុងកម្មវិធីប្រគំតន្ត្រីមួយចំនួន។

យ៉ាងណាមិញ ថ្មីៗនេះ លោក សាន រ័ត្នបញ្ញាសក្តិ បានបង្ហោះរូបភាពចាស់មួយសន្លឹក ដែលលោកបានថតតាំងពីអំឡុងឆ្នាំ ​២០២១ កន្លងទៅ ដែលជារូបភាពកំពុងថតសំឡេង​ និង មានលោក ហេង ពិទូ ដែលជាមិត្តចាស់នៅឈរពីក្រោយ អមនឹងសារមួយឃ្លាថា៖ «អ្វីត្រូវលះបង់គឺបាប អ្វីដែលត្រូវសម្អាតគឺចិត្ត អ្វីដែលត្រូវប្រព្រឹត្តគឺបុណ្យ»។ រូបភាពមួយសន្លឹកអមនឹងសារនោះដែរ មើលទៅសាមញ្ញៗ ប៉ុន្តែបានធ្វើឱ្យអ្នកលេងបណ្តាញសង្គមហ្វេសប៊ុក ចូលទៅបញ្ចេញមតិពាក់ព័ន្ធនឹងមិត្តភាពរបស់តារាចម្រៀងប្រុសទាំង ២ ដែលនៅបន្តរាប់អានគ្នាមកដល់បច្ចុប្បន្ននេះ៕