ធ្លាប់ជិតដិតគ្នាខ្លាំង ខានជួបមួយរយៈ សារ៉ាយ សក្ខិណា បែរជួប អ៊ុន សិទ្ធា ម្តងទៀតក្នុងទិដ្ឋភាពដ៏ខ្លោចចិត្តនេះ

ជាការពិតណាស់ មរណភាពរបស់តារាសម្តែង លោក អ៊ុន សិទ្ធា បាន និង កំពុងធ្វើឱ្យមហាជន ជាពិសេស មិត្តទាំងក្នុង ក្រៅសិល្បៈជាច្រើនបានបង្ហាញការសោកស្តាយ និង ចូលរួមរំលែកទុក្ខដល់ក្រុមគ្រួសាររបស់លោកជាបន្តបន្ទាប់។ ក្នុងនោះ អ្វីដែលនៅតែបន្តឮ និង ចែករំលែក គឺការទទួលយកមិនទាន់បាននៃការចាកចេញភ្លាមៗរបស់លោក អ៊ុន សិទ្ធា តែម្តង។

ជាក់ស្តែង ងាកមកកាន់អ្នកនាង សារ៉ាយ សក្ខិណា ដែលត្រូវបានគេដឹងថា ធ្លាប់ជាដៃគូសម្តែង ជាដៃគូការងារនឹងគ្នា តាំងពីជំនាន់ប្រឡូកក្នុងវិស័យសិល្បៈដំបូងៗ ជាពិសេសនោះ គឺធ្លាប់ជាតារាបង្ហាញម៉ូដក្នុងក្រុមហ៊ុន Cambodia Super Model ជាមួយគ្នាផងនោះ ក៏បានបង្ហាញអារម្មណ៍ទទួលយកមិនទាន់បានដូចគ្នា។

អ្នកនាង សារ៉ាយ សក្ខិណា បញ្ជាក់ថា ខានជួបគ្នាជាមួយនឹង លោក អ៊ុន សិទ្ធា យូរមកហើយ ប៉ុន្តែចុងក្រោយជួបគ្នាម្តងទៀតបែរជាត្រូវលាគ្នា មកថតរូបជាមួយគ្នានឹងរូបថត ដែលគ្មានសំឡេងទៅវិញ។

ក្នុងនោះ អ្នកនាង សារ៉ាយ សក្ខិណា បាបរៀបរាប់ទាំងក្ដុកក្ដួលថា៖ «ខានជួបគ្នាយូរ មកជួបគ្នាវិញជាមួយនឹងរូបថតមួយប៉ុស្តិ៍បែបនេះ ជារូបថតដែលទទួលយកមិនបាន។ បងពិតជាទៅលឿនពេកហើយ សូមឱ្យបងទៅកាន់សុគតិភព។ អ្នកគ្រប់គ្នា នឹងចងចាំមនុស្សល្អដូចបងរហូត»៕