នៅថ្ងៃទី ១៩ ខែឧសភា ឆ្នាំ ២០២៥ កន្លងទៅនេះ លើបណ្ដាញសង្គមបានផ្ទុះចែករំលែកព័ត៌មានដ៏ភ្ញាក់ផ្អើលទាក់ទងនឹងបវរកញ្ញាវៀតណាម នាង Nguyen Thuc Thuy Tien ដែលជាម្ចាស់មកុដ Miss Grand International 2021 ត្រូវបានទីភ្នាក់ងារប៉ូលិសស៊ើបអង្កេតនៃក្រសួងសន្តិសុខសាធារណៈ បានធ្វើការចាប់ខ្លួនជាបណ្ដោះអាសន្ន ជុំវិញករណីបោកប្រាស់អតិថិជនពាក់ព័ន្ធនឹងផលិតផលស្ករគ្រាប់ Kera។
ជុំវិញរឿងរ៉ាវដ៏ភ្ញាក់ផ្អើលខាងលើនេះ បានធ្វើឱ្យមហាជនអ្នកលេងបណ្ដាញសង្គម ជាពិសេសអ្នកគាំទ្រវិស័យបវរកញ្ញាទូទាំងប្រទេសដែលធ្លាប់ស្គាល់ និង គាំទ្របវរកញ្ញា Nguyen Thuc Thuy Tien មានការផ្ទុះចាប់អារម្មណ៍ចែករំលែក និង បញ្ចេញមតិវែកញែកខ្លាំងរៀងៗខ្លួនលើហ្វេសប៊ុក។
ជាមួយគ្នានោះដែរ ងាកទៅមើលហ្វេសប៊ុករបស់បវរកញ្ញាកម្ពុជា ប៉ូគឹមថេង សុតធីតា ដែលជាបវរកញ្ញារួមជំនាន់ប្រកួតជាមួយនាង Nguyen Thuc Thuy Tien ក្នុងកម្មវិធីអន្តរជាតិ Miss Grand International 2021 វិញ ក៏បានបង្ហោះចែករំលែកព័ត៌មានភ្ជាប់ជាមួយសារបង្ហាញក្ដីបារម្ភ និង ជូនពរដល់បវរកញ្ញាវៀតណាមរូបនេះដែរថា ៖ «សូមជូនពរពីចម្ងាយ សង្ឃឹមថាគ្រប់យ៉ាងនឹងទទួលបានភាពល្អប្រសើរមកវិញ»។
លើសពីនេះ សុតធីតា ក៏បានបញ្ចេញមតិក្នុងខមមិនឆ្លើយតបជាមួយអ្នកគាំទ្រទៀតថា ៖ «គេធ្វើមិនល្អជារឿងរបស់គេ តែការនិយាយស្តីពាក្យល្អៗ និង មានធម៌ក្នុងខ្លួន ជាសីលធម៌របស់យើង»៕
