ធ្លាប់ឃើញស្លៀកពាក់សដើរបិណ្ឌបាត! ពេលនេះក្រសួងចុះណែនាំ លោក ថោង សុខុម ហៅលោកគ្រូ ភ្នំគូលេន ឱ្យធ្វើកិច្ចសន្យាបញ្ឈប់សកម្មភាព

នៅថ្ងៃទី ២៥ ខែឧសភា ឆ្នាំ ២០២៥ ក្រសួងធម្មការ និង សាសនា បានសហការជាមួយ ស្ថាប័នពាក់ព័ន្ធ និង អាជ្ញាធរមូលដ្ឋានខណ្ឌសែនសុខ បានចុះធ្វើការណែនាំ លោក ថោង សុខុម ហៅលោកគ្រូភ្នំគូលេន ពាក់ព័ន្ធនឹងសកម្មភាពស្លៀកពាក់សដើរបិណ្ឌបាត។

ការចុះណែនាំនេះ ធ្វើឡើងក្រោយមានការបង្ហោះវីដេអូសកម្មភាព និង រូបភាព ធ្វើឱ្យប៉ះពាល់ដល់សង្គម នៅតាមបណ្ដាញសង្គមនានា ដោយក្នុងនោះ មន្ទីរធម្មការ និង សាសនា បានឱ្យលោក ថោង សុខុម ធ្វើកិច្ចសន្យាបញ្ឈប់ការបង្ហោះ និង លុបវីដេអូរូបថតសកម្មភាពផ្សេងៗ មានការប្រោះព្រំ ស្រោចទឹក ព្យាបាលជំងឺ ប្រសិទ្ធីមន្តគាថា ការដើរបិណ្ឌបាតដោយស្លៀកដណ្ដប់គ្រងសំពត់បែបអ្នកបួសព្រះពុទ្ធសាសនា ជាដើម ទាំងចាស់ ទាំងថ្មី ចេញពីប្រព័ន្ធបណ្ដាញសង្គមទាំងអស់។

ក្នុងនោះ បុគ្គលឈ្មោះ ថោង សុខុម ហៅលោកគ្រូភ្នំគូលេន ក៏បានសន្យាបញ្ឈប់ការបង្ហោះវីដេអូ រូបភាពសកម្មភាពនៅលើប្រព័ន្ធបណ្តាញសង្គម (Facebook, Instagram, TikTok, Telegram, Whatsup, Cool App ។ល។) ចាប់ពីពេលនេះតទៅ ព្រមទាំងអំពាវនាវអ្នកលេងបណ្តាញសង្គមទាំងអស់ បញ្ឈប់យករូបភាពរបស់លោក ទាំងចាស់ទាំងថ្មី ទៅបង្ហោះចែកចាយតាមបណ្តាញសង្គមបន្តតទៅទៀត និង សូមឱ្យលុបវីដេអូ និង រូបភាពដែលបានបង្ហោះទាំងចាស់ទាំងថ្មីចេញទាំងអស់៕