មហាជននិយមតាមដាន ពីការផលិតមាតិកាចម្អិនម្ហូបរបស់ចុងភៅជនបទខាងខេត្តបន្ទាយមានជ័យ កញ្ញា ឆម ស្រីផាច ច្បាស់ជាបានជ្រាបហើយថា មួយរយៈក្រោយនេះ ក្រៅពីការផលិតវីដេអូធ្វើម្ហូប កញ្ញា ក៏បានសម្រុកជួយការងារសប្បុរសធម៌ទៅដល់កងទ័ពកំពុងឈរជើងការពារព្រំដែនផងដែរ។
យ៉ាងណាមិញ ថ្មីៗនេះ កញ្ញា ឆម ស្រីផាច បានធ្វើឱ្យមហាជនចាប់អារម្មណ៍នឹងជីវិតឯកជនរបស់នាងយ៉ាងខ្លាំង ខណៈអ្នកផលិតមាតិកាសម្បុរស្រអែមស្រស់រូបនេះ បានបង្ហោះរូបផ្អែមល្ហែមនឹងគូស្នេហ៍នៅក្នុងថ្ងៃខួបគម្រប់ចំណងស្នេហ៍ ២ ឆ្នាំ របស់ពួកគេ។
ជាការពិតណាស់ កន្លងមក ក្រៅពីការបង្ហាញពីវីដេអូធ្វើម្ហូប កញ្ញា ស្រីផាច ក៏មិនសូវបង្ហាញពីជីវិតឯកជនពាក់ព័ន្ធនឹងរឿងរ៉ាវបេះដូងនោះទេ ប៉ុន្តែមួយរយៈចុងក្រោយនេះ កញ្ញាតែងតែបង្ហោះរូបជាគូរឿយៗ រហូតធ្វើឱ្យអ្នកគាំទ្រលើកឡើងថា មិនយូរទេ កញ្ញា ស្រីផាច នឹងជម្រាបពីដំណឹងល្អហើយ។
លើសពីនោះ ក្នុងខួបស្នេហ៍គម្រប់ ២ ឆ្នាំ លើកនេះ ស្រីផាច បានបង្ហោះរូប និង Caption បានធ្វើឱ្យអ្នកគាំទ្រចូលទៅបញ្ចេញមតិព្រោងព្រាតទៅដល់គូស្នេហ៍របស់អ្នកផលិតមាតិការូបនេះ ព្រមទាំងចង់ឃើញថ្ងៃពិសេសរបស់អ្នកទាំង ២ ឆាប់ៗទៀតផង៕
