ស្ថិតក្នុងរដូវវស្សា ទឹកដីអង្គរវត្ត ជាទីកម្សាន្តអារម្មណ៍ដ៏អស្ចារ្យមួយសម្រាប់ភ្ញៀវទេសចរជាតិ និង អន្តរជាតិ ដូចទៅនឹងឃ្លាកំពុងពេញនិយមថា «When life hurt Siem Reap heal» ដែលទិដ្ឋភាពក្នុងរដូវកាលនេះ មានទេសភាពល្អស្រស់ត្រកាល ប្រកបដោយកម្រាលស្មៅពណ៌បៃតងក្រាលក្របសឹងគ្រប់ផ្ទៃប្រាសាទ បូករួមនឹងដើមឈើធំៗត្រឈឹងត្រឈៃពាសពេញក្នុងតំបន់អង្គរ ក្លាយជាទីមនោរម្យក្រៃលែង ដកចិត្តពុំរួច។
អ្វីដែលកាន់តែពិសេសទៀតនោះ ក្នុងរដូវកាលបច្ចុប្បន្ននេះ គេកំពុងពេញនិយមនូវប្លង់ថតចំនួន ៣ ក្នុងភូមិសាស្ត្រខេត្តសៀមរាបដែនដីដ៏ពិសិដ្ឋមួយនេះ ខណៈបើបានទៅហើយពុំបានថតច្បាស់ជាគក់ទ្រូងស្ដាយក្រោយ ដែលប្លង់ទាំងនោះមានដូចជា ៖
១. ប្លង់ថតនៅប្រាសាទអង្គរវត្តទិសខាងជើង
ពិតណាស់ ប្លង់រូបភាពកំពុងពេញនិយម និង កំពុងផ្ទុះការចាប់អារម្មណ៍ខ្លាំងនោះ គឺប្លង់ថតដែលស្ថិតនៅក្នុងប្រាសាទអង្គរវត្ត (ទិសខាងជើង) ជាប្លង់ទិដ្ឋភាពដែលប្រៀបបានទៅនឹងផ្ទាំងគំនូរ ដែលបច្ចុប្បន្នប្លង់នេះកម្រមានអ្នករំលងណាស់ពេលបានទៅសៀមរាប ដែលឈានដល់ការតម្រង់ជួរចាំថតយ៉ាងត្រៀបត្រាទៀតផង។
២. ប្លង់ថតម៉ាត់ឆា (Matcha) នៅប្រាសាទព្រះខ័ន
មែនទែនទៅពុំមានម៉ាត់ឆាអ្វីនៅទីនោះទេ តែស្រះទឹកជិតប្រាសាទព្រះខណ្ឌក្នុងរដូវវស្សា ក្រោយត្រូវភ្លៀងធ្លាក់ស្រោចស្រព បានបង្កើតទៅជាទស្សនីយភាពមានពណ៌បៃតងសាយសព្វ ប្រៀបបានទៅនឹងម៉ាត់ឆានោះឯង។ បច្ចុប្បន្នទីតាំងនេះ ជាប្លង់ថតដ៏ពេញនិយម កំពុងទទួលបានការចាប់អារម្មណ៍យ៉ាងខ្លាំង រហូតត្រូវតម្រង់ជួររង់ចាំថតផងដែរ។
៣. ប្លង់ថតយុវវ័យ នៅហាងកាហ្វេកាំមឹ
មកដល់ប្លង់មួយនេះ ដ្បិតថាចាកប្រធានបទពីប្លង់ប្រាសាទទាំង ២ ខាងលើបន្តិច តែប្លង់ថតរូបនៅទីតាំងហាងកាហ្វេកាំមឹ នៅក្នុងក្រុងសៀមរាប ពិតជាប្លង់ដ៏ពេញនិយមមួយសម្រាប់យុវវ័យទាន់សម័យ ពុំអាចប្រកែកបាន ព្រោះថាហាងកាហ្វេមួយនេះ មានយុវវ័យទៅថតរូបលេងកម្សាន្តច្រើន បន្ទាប់ពីការធ្វើដំណើរមកពីប្រាសាទ ជាទីតាំងដែលអាចស្លៀកពាក់ស្អាតៗទាន់សម័យ ជាមួយ background ហាងដ៏ស្រស់ស្អាតបែបជប៉ុន។ បច្ចុប្បន្នទីតាំងនេះ ក៏មានភ្ញៀវច្រើនតម្រង់ជួរគ្នាចាំថតផងដែរ៕
