ទៅលេងកោះចុះមុជទឹកសមុទ្រជ្រៅ ជួបត្រីឆ្លាមតែមិនហែលគេច បែរជាប្រឹងហែលទៅជិតវាដើម្បីថតរូប ត្រូវត្រីខាំដា./ច់ដៃទាំងសងខាង

សារព័ត៌មាន Oddity Central បានរាយការណ៍ពីរឿងរ៉ាវរបស់នារីជនជាតិកាណាដាម្នាក់ ដែលត្រូវត្រីឆ្លាមខាំដាច់ដៃទាំងសងខាង ខណៈកំពុងមុជទឹកក្នុងសមុទ្រ ដោយសារតែនាងឃើញវាហើយ ហែលទៅថតរូបវា​ តែមិនព្រមហែលគេច។

តាមព័ត៌មានបានឱ្យដឹងថា ហេតុការណ៍មួយនេះ បានកើតឡើងកាលពីថ្ងៃទី ៧ ខែកុម្ភៈ ឆ្នាំ ២០២៥ កន្លងទៅ ដែលស្រ្តីរងគ្រោះខាងលើ គឺជាជនជាតិកាណាដា វ័យ ៥៥ ឆ្នាំ។ នៅថ្ងៃកើតហេតុ នាងបានចុះទៅមុជទឹកសមុទ្រប្រវែងជ្រៅនៅលើកោះ Turks នាតំបន់ Caicos របស់អង់គ្លេស។ ខណៈកំពុងតែមុជក្នុងទឹកនោះ នាងក៏បានឃើញត្រីឆ្លាមធំ ដែលមានប្រវែងជិត ២ ម៉ែត្រ ហើយនាងក៏បានប្រញាប់ហែលទៅជិតវាដើម្បីថតរូប ស្រាប់តែវាក៏បានវាយប្រហារមកកាន់នាង ធ្វើឱ្យនាងរបួសដៃទាំងសងខាង។

យ៉ាងណាមិញ នាងត្រូវបានគេជួយឱ្យឡើងលើគោកវិញ រួចក៏បានបញ្ជូនទៅព្យាបាលនៅមន្ទីរពេទ្យក្នុងតំបន់ ហើយត្រូវគ្រួសារបញ្ជូនទៅព្យាបាលបន្តទៀតនៅឯមន្ទីរពេទ្យក្នុងប្រទេសកាណាដា តែជាសំណាងអាក្រក់ខាងគ្រូពេទ្យមិនអាចព្យាបាលដៃរបស់នាងបានឡើយ គឺនាងត្រូវកាត់ដៃទាំងសងខាងចោលទាំងស្រុង។ ដោយឡែក អាជ្ញាធរប្រចាំតំបន់ ក៏បានអំពាវនាវឱ្យអ្នកទេសចរបង្កើនការប្រុងប្រយ័ត្នផងដែរ ជាពិសេសចំពោះការមុជទឹកនេះតែម្តង៕

ប្រភព៖ Kapook