ថ្មីៗនេះ Michelle Tagliamonte ជាជនជាតិអាមេរិក វ័យ ៥៨ ឆ្នាំ បានទម្លាយពីបទពិសោធដែលដឹងថាខ្លួនកើតជំងឺមហារីក និង ព្យាបាលទាន់ពេលវេលា ដោយសារតែការសង្កេតទៅលើក្រចកដៃ។
Michelle បានឱ្យដឹងថា នាងជាមនុស្សដែលចូលចិត្តធ្វើក្រចកជារឿងរាល់ខែ ហើយកាលពីខែកញ្ញា ឆ្នាំ ២០២៤ កន្លងទៅនាងក៏សង្កេតឃើញថាក្រចកមេដៃខាងស្តាំរបស់នាងមានឡើងស្នាមឆ្នូតខ្មៅយ៉ាងចម្លែក។ លុះមួយខែកន្លងផុតទៅ វានៅតែមិនបាត់ទៅវិញ ទើបនាងសម្រេចចិត្តទៅពេទ្យពិនិត្យមើល ដែលលទ្ធផលបានឱ្យដឹងថា នាងកំពុងកើតជំងឺមហារីកស្បែក។
យ៉ាងណាមិញ ជាសំណាងល្អដែលជំងឺរបស់នាងស្ថិតក្នុងដំណាក់កាលដំបូង (melanoma in situ) ដែលត្រូវព្យាបាលដោយការវះកាត់យកក្រចកមេដៃចេញ នឹងត្រូវដាំស្បែកថ្មី។ ដោយឡែក មកទល់ពេលនេះ មេដៃរបស់នាងក៏ចាប់ផ្តើមជាសះស្បើយបណ្តើរៗផងដែរ ហើយនាងបានឱ្យដឹងថា នាងអរគុណខ្លួនឯងដែលចូលចិត្តធ្វើក្រចកជាប្រចាំ ជាហេតុធ្វើឱ្យសង្កេតឃើញភាពមិនប្រក្រតីរបស់វា ហើយអាចព្យាបាលទាន់ពេលវេលាបែបនេះ៕
ប្រភព៖ Sanook
