អ្នកគាំទ្រ របស់តារាចម្រៀងរ៉េប KingChi ច្បាស់ជាបានជ្រាបមកហើយនូវដំណឹងសុខភាពរបស់ភរិយារបស់លោក គឺអ្នកនាង ម៉ាណូឡែន ដែលវលាងឈាមជាប្រចាំ និង ត្រូវវះកាត់ប្តូរក្រលៀនផងនោះ។
ក្នុងនោះ ក្រោយពីការប្រកាសលក់ផ្ទះ ដើម្បីព្យាបាលភរិយា តារាចម្រៀង KingChi ត្រូវបានអ្នកគាំទ្រ និង មិត្តភក្តិក្នុងសិល្បៈជាច្រើន បានបរិច្ចាគថវិកាទៅកាន់លោកទាំងដែលលោកមិនបានសុំជំនួយនោះឡើយ។ ចំណុចនេះដែរ បានបង្ហាញថាតារាចម្រៀងរ៉េប KingChi ពិតជាមានមនុស្សល្អៗនៅជុំវិញខ្លួនលោកជាច្រើន។
ក្រោយពីបានព្យាបាលជំងឺ ដោយការលាងឈាមបានមួយរយៈនោះ ភរិយាតារាចម្រៀងរ៉េប KingChi គឺអ្នកនាង ម៉ាណូឡែន ក៏តម្រូវទៅក្រៅប្រទេស ដើម្បីវះកាត់ក្រលៀនដែរ ដែលនេះធ្វើឱ្យទំហំនៃការចំណាយរបស់លោកកាន់តែច្រើន។
យ៉ាងណាមិញ កាលពេលថ្មីៗនេះ មហាជនកំពុងផ្ទុះការចាប់អារម្មណ៍ និង សរសើរដល់សិល្បករ ៤ រូប រួមមាន កញ្ញា Sophai, លោក Juvie Lin, តារាចម្រៀងរ៉េប Mc Sey និង តារាចម្រៀង 1NE បានចាប់ដៃគ្នានឹងតារាចម្រៀងរ៉េប KingChi ត្រៀមរៀបចំការប្រគំតន្ត្រី ដើម្បីប្រមូលថវិកាពីការលក់សំបុត្រទាំងអស់ជូនដល់ភរិយាតារាចម្រៀង KingChi ដើម្បីវះកាត់។
ក្នុងនោះ ក្រោយពីឃើញទឹកចិត្តធំធេងរបស់ប្អូនៗរួមអាជីព KingChi បានបង្ហោះសារថា៖ «ខ្ញុំមិនដែលហូរទឹកភ្នែកព្រោះទុក្ខលំបាកទេ តែពេលនេះទឹកភ្នែកខ្ញុំហូរព្រោះក្តីស្រលាញ់របស់បងប្អូនចំពោះគ្រួសារខ្ញុំ»៕
