បើនិយាយដល់ដំរីនៅសួនសត្វភ្នំតាម៉ៅ ដំរីញីឈ្មោះ Lucky គឺជាដំរីមួយក្បាលដ៏ល្បី និង ឆ្លាតវៃខ្លាំង មានសមត្ថភាពច្រើនរាប់តាំងពីចេះរាំ ចេះដោះមួក ចេះទាត់បាល់ និង ចេះយកលុយពីភ្ញៀវដែលចូលទស្សនាជាដើម។ ការធំធាត់ឡើងជាមួយសុខភាពល្អ និង ចេះបញ្ចេញសមត្ថភាពគ្រប់បែបយ៉ាងនេះដែរ គឺក្រោមការមើលថែដិតដល់ និង ពោរពេញដោយក្ដីស្រឡាញ់ពីសំណាក់ម្ចាស់របស់នាង គឺលោក ទ្រី ស៊ីថេង។
យ៉ាងណាមិញ ថ្មីៗនេះ អ្នកលេងបណ្តាញសង្គមហ្វេសប៊ុកជាច្រើន បានបង្ហាញអារម្មណ៍ក្តុកក្តួល ខណៈលោក ទ្រី ស៊ីថេង សម្រេចចិត្តលាឈប់ពីកន្លែងដែលលោកស្រឡាញ់ និង ធ្វើដោយបេះដូងអស់រយៈពេលជាង ៣០ ឆ្នាំមកនេះ។ លើសពីនោះ គឺវីដេអូរបស់ Lucky ដែលបានរត់តាមលោក ទ្រី ស៊ីថេង ហាក់បង្ហាញពីអារម្មណ៍មិនចង់ឱ្យម្ចាស់របស់ខ្លួនចាកចោលទៅឡើយ។
វីដេអូខាងលើនោះដែរ បានធ្វើឱ្យមហាជនជាច្រើនបានចែករំលែក និង បានបញ្ចេញមតិរៀងៗខ្លួន ដោយក្នុងនោះ គេបានឃើញតារាស្រី ថាច ម៉ារី ក៏បានបង្ហោះសារដូចគ្នាដែរ ដោយនាងបានបង្ហាញអារម្មណ៍ក្នុងនាមជាអ្នកស្រឡាញ់ និង ចិញ្ចឹមសត្វ។
កញ្ញា ម៉ារី បានរៀបរាប់ថា ៖ «រឿងដំរី lucky គឺជារឿងដែលពិបាកនិយាយ តែអ្វីដែលសំខាន់បំផុតគឺ បង TRY Sitheng មិនមែនគ្រាន់តែជាអ្នកមើលថែដំរីទេ។ គាត់គឺជា ហ្មដំរី ដែលដំរី lucky ជាអ្នកជ្រើសរើស មិនមែនគ្រប់គ្នាអាចធ្វើជាហ្មដំរីបានទេ ហើយដំរីក៏មិនមែនជាសត្វស្រួលមើលថែដែរ តែមិនត្រូវចិត្តជាន់ងាប់។ រឿងវាវែងឆ្ងាយ ប្រជាជនកម្ពុជាមិនពេញចិត្តនឹងការចាកចេញរបស់អ្នកដែលបូជាជីវិត ដើម្បីសត្វព្រៃទេ ជាពិសេសលោក Nick ! មានទេយុត្តិធម៌សម្រាប់ពួកគាត់? ការងារជួយសត្វ និង ថែរក្សាសត្វមិនមែនគ្រាន់តែជាការងារយកប្រាក់ខែទេ គឺយកបេះដូងមកធ្វើ»៕
