កម្មវិធី Miss Cosmo Cambodia 2025 បានរកឃើញម្ចាស់មកុដឯកហើយកាលពីកន្លងទៅនេះ ដែលបានទៅលើបេក្ខភាព MCC 12 គឺកញ្ញា ផន ស្រីពី។ ចំណែកលំដាប់រងទី ១ បានទៅលើកញ្ញា ប៊ី សុធារី ដែលអ្នកគាំទ្រជាច្រើនបានរំពឹងខ្ពស់ថានាងគឺជាអ្នកឈ្នះ។
អាចថា នេះគឺជាលើកទីមួយហើយដែល ប៊ី សុធារី ជាប់តំណែងលំដាប់រងទី ១ នៅលើឆាកជាតិ ខណៈដែលកន្លងមកនាងដណ្តើមបានសុទ្ធតែជ័យលាភីឯក។ មិនថាលទ្ធផលយ៉ាងណាក្តី បើគិតពីសមត្ថភាព បទពិសោធ និង ភាពក្លាហាន ប៊ី សុធារី នៅតែឈរតំណែងជាបវរកញ្ញាខ្លាំង និង អស្ចារ្យបំផុត ហើយក៏ជាស្ត្រីខ្មែរដំបូងដែលប្រឡូកការប្រកួតកម្មវិធីបវរកញ្ញាច្រើនជាងគេក្នុងប្រវត្តិសាស្ត្រកម្ពុជា។
តួយ៉ាង នាងចូលប្រកួតកម្មវិធីសម្រស់តាំងពីអាយុ ១៤ ឆ្នាំ និង បានតំណាងឱ្យកម្ពុជាទៅបង្ហាញមុខនៅលើឆាកអន្តរជាតិ ខណៈដែលគ្រានោះពុំទាន់មានស្ត្រីកម្ពុជាវ័យស្រករនាងណាមួយ ហ៊ានឡើងប្រកួតនៅលើឆាកអន្តរជាតិឡើយ។ បើគិតមកទល់ពេលបច្ចុប្បន្ន រួមទាំងកម្មវិធី Miss Cosmo Cambodia 2025 នាងប្រកួតឆាកជាតិ និង អន្តរជាតិ ប្រមាណជាង ១០ កម្មវិធីមកហើយ ហើយនាងក៏ទទួលបានពានរង្វាន់ច្រើនរាប់មិនអស់ផងដែរ។
សម្រាប់កម្មវិធីចុងក្រោយ ជាមួយតំណែងលំដាប់រងទី ១ នាងបានឈ្នះពានរង្វាន់ចំនួន ៣ រួមមាន ៖ Best in Runway Challenge, Darling of the Crowd, និង Miss Idol។ ទោះរបូតតំណែងឯកក្នុងស្រុក តែនាងទទួលបានការស្រលាញ់ និង គាំទ្រជាខ្លាំងពីមហាជន។ គ្រប់គ្នាក៏សង្ឃឹមថា នាងនឹងរឹងមាំ ហើយបន្តដំណើរទៅមុខទៀតក្នុងវិស័យមួយនេះ៕
