នៅព្រឹកម៉ោង ៨ ថ្ងៃទី ១៧ ខែកញ្ញា ឆ្នាំ ២០២៥ នេះ មានករណីបង្កចលាចលជាថ្មីនៅក្នុងខេត្តណារ៉ាធីវ៉ាត់ ប្រទេសថៃ ដែលឡានពាសដែករបស់ទាហានត្រូវគេលួចដាក់គ្រាប់បែកបំផ្ទុះក្រឡាប់ធ្លាក់ផ្លូវ ហើយបង្កឱ្យទាហាន ៤ នាក់បានរងរបួស។
តាមព័ត៌មានបានឱ្យដឹងថា ហេតុការណ៍បានកើតឡើងលើផ្លូវមួយខ្សែឈ្មោះបានប៊ឺរ៉ាង៉េ នាភូមិលេខ ៣ ឃុំតុកឌែង ស្រុកសុង៉ៃប៉ាឌី ខេត្តណារ៉ាធីវ៉ាត់ ដោយក្រុមទាហានខាងលើស្ថិតនៅក្នុងកងពលទាហាល្បាតលេខ ៤៨១១ កំពុងតែធ្វើដំណើរក្នុងឡានពាសដែកដើម្បីល្បាតសុវត្ថិភាពតាមភូមិស្រុក តែស្រាប់មកដល់កន្លែងកើតហេតុ ក៏កើតការផ្ទុះយ៉ាងខ្លាំងក្លា បណ្តាលឱ្យឡានក្រឡាប់ធ្លាក់ទៅចំហៀងផ្លូវតែម្តង។
យ៉ាងណាមិញ ក្នុងនោះមានទាហាន ៤ នាក់បានរងរបួស រួចក៏ត្រូវបញ្ចូនទៅសង្រ្គោះនៅមន្ទីរពេទ្យក្នុងតំបន់ ហើយខាងអាជ្ញាធរកម្ចាត់គ្រឿងផ្ទុះក៏បានកំពុងចុះទៅកន្លែងកើតហេតុដើម្បីត្រួតពិនិត្យ និងប្រមូលភស្តុតាងទុកផងដែរ៕
ប្រភព៖ Khaosod
