សារព័ត៌មានបរទេស បានរាយការណ៍ពីករណីដ៏គួរឱ្យរន្ធត់មួយនៅប្រទេសនីហ្សេរីយ៉ា ដែលមានឡានដឹកសាំងមួយគ្រឿងបានក្រឡាប់ ប្រជាជនក៏បានរត់នាំគ្នាទៅដួស តែចៃដន្យឡានបានផ្ទុះឆេះ បណ្តលឱ្យមនុស្ស ៧០ នាក់បានស្លាប់ និង ៥៦ នាក់បានរងរបួស។
តាមព័ត៌មានបានឱ្យដឹងថា ហេតុការណ៍មួយនេះ បានកើតឡើងកាលពីថ្ងៃទី ១៨ ខែមករា ឆ្នាំ ២០២៥ កន្លងទៅនៅរដ្ឋ Niger ។ ដោយក្នុងនោះ មានឡានដឹកសាំងមួយគ្រឿងបានក្រឡាប់នៅលើផ្លូវ ហើយប្រជាជននៅក្បែរៗនោះក៏បាននាំគ្នាទៅដួសសាំងដែលហូរចេញពីឡាននោះដោយមិនគិតពីសុវត្ថិភាពឡើយ ទោះបីជាអាជ្ញាធរបានហាមឃាត់ក៏ដោយ។ ចៃដន្យឡានក៏បានផ្ទុះឆេះយ៉ាងសន្ធោសន្ធៅ ដែលបណ្តាលឱ្យមនុស្ស ៧០ នាក់បានបាត់បង់ជីវិត និង ៥៦ នាក់បានរងរបួស ហើយហាងលក់អីវ៉ាន់នៅក្បែរនោះៗចំនួន ១៥ ហាង ក៏ត្រូវបានបំផ្លាញ។
យ៉ាងណាមិញ អ្នកដែលរងរបួសចំនួន ៥៦ នាក់ ត្រូវបានអាជ្ញាធរបញ្ជូនទៅមន្ទីរពេទ្យដើម្បីព្យាបាល ចំណែកអ្នកស្លាប់វិញក៏ត្រូវបានអាជ្ញាធរ និង អ្នកស្រុកនាំគ្នាយកទៅបញ្ចុះទៅតាមប្រពៃណីឥស្លាមផងដែរ៕
ប្រភព៖ Khaosod
