ទៀតហើយ! ចាប់បានសាច់បង្កកនាំចូលខុសច្បាប់ពីវៀតណាម មានស្បែកជ្រូក ជើងជ្រូក ហតដក សរុបជាង ៣ ពាន់គីឡូ ប្រុងលក់ចែកចាយនៅភ្នំពេញ

នៅវេលាម៉ោង ២០ និង ៣០ នាទី នាថ្ងៃទី ២១ ខែកក្កដា ឆ្នាំ ២០២៥ ក្រុមអន្តរាគមន៍បង្ក្រាបបទល្មើសចលនាសត្វ នៃអគ្គដ្ឋានសុខភាពសត្វ និង ផលិតកម្មសត្វ បានសហការជាមួយការិយាល័យផលិតកម្ម និង បសុព្យាបាលខេត្តកំពង់ចាម ចុះឃាត់ចាប់រថយន្ត ១ គ្រឿង ម៉ាកSSANGYONG ISTANA ដែលមានដឹកសាច់សត្វបង្កកសរុបចំនួន ៣៧៩៨ គីឡូក្រាម។

នៅក្នុងរថយន្តដែលសមត្ថកិច្ចបានឃាត់ មានសាច់បង្កកចំនួន ១៨៧ កេសក្រដាស ស្មើនឹង ២២៤៨ គីឡូក្រាម( រួមមានស្បែកជ្រូក និង ជើងជ្រូក) និង ហតដកសាច់មាន់ចំនួន ៣១ បាវ ស្មើនឹង ១៥៥០ គីឡូក្រាម ខណៈរថយន្តខាងលើ បានដឹកសាច់សត្វបង្កកទាំងនេះ ចេញពីប្រទេសវៀតណាម ឆ្ពោះមកលក់ចែកចាយនៅរាជធានីភ្នំពេញ ដោយគ្មានលិខិតអនុញ្ញាតអ្វីទាំងអស់ ហើយត្រូវបានក្រុមការងារឃាត់ចាប់លើផ្លូវបេតុង ឃុំជីហែរ ស្រុកកោះសូទិន ខេត្តកំពង់ចាម។

បច្ចុប្បន្នក្រុមការងារបាននាំយកវត្ថុតាង និង បទល្មើសខាងលើទៅរក្សារទុកនៅទីតាំងចត្តាឡីស័កសត្វរបស់អគ្គនាយកដ្ឋានសុខភាពសត្វ និង ផលិតកម្មសត្វ ដើម្បីអនុវត្តន៍ទៅតាមនីតិវិធីច្បាប់៕

ប្រភព ៖ Sarat Hun