ការរញ្ជួយដីមួយមានកម្លាំងរញ្ជួយកម្រិត ៤.៥ រ៉ិចទ័រ បានវាយប្រហារក្នុងតំបន់មួយនៃ Chiang Mai ដែលបានធ្វើឱ្យអ្នកស្រុកភ័យស្លន់ស្លោ ខណៈផ្ទះញ័ររង្គើគួរឱ្យខ្លាច។ តាមរបាយការណ៍បានឱ្យដឹងថា សរុបទាំងការរញ្ជួយដីព្រឹកមិញនេះ គឺមានការរញ្ជួយចំនួន ៤ លើកមកហើយបានកើតឡើង។
បើតាមនាយកដ្ឋានតាមដានការរញ្ជួយដីនៃនាយកដ្ឋានឧតុនិយមថៃ បានរាយការណ៍ពីការរញ្ជួយដីមួយនៅក្នុងសង្កាត់ Mae Pang នៃខេត្ត Chiang Mai ដែលមានកម្រិត ៤.៥ រ៉ីចទ័រ ក្នុងជម្រៅដី ១ គីឡូម៉ែត្រ នៅប្រមាណជាវេលាម៉ោង ១៤ និង ៧ នាទី ថ្ងៃទី ២ ខែមិថុនា ឆ្នាំ ២០២៥ នេះ។ ខណៈមុនការរញ្ជួនេះដែរ ក៏មានសេចក្តីរាយការថា មានការរញ្ជួយដីកម្រិត ១.៧ រ៉ិចទ័រ បានវាយប្រហារនៅសង្កាត់ Sop Peng ផងដែរ កាលពីវេលាម៉ោង ១១ និង ៣៦ នាទីព្រឹក ដែលមានជម្រៅ ៣ គីឡូម៉ែត្រ។
គ្រោះរញ្ជួយដីនេះ បានអ្នកស្រុកជាច្រើននាក់ និង អ្នកនៅក្បែរនោះមានអារម្មណ៍ញ័រ បន្ទាប់ពីការរញ្ជួយដីកម្រិត ៤.៥ រ៉ិចទ័រ នៅក្នុងតំបន់ Mae Pang។ អ្នកខ្លះបានរាយការណ៍ថា មានអារម្មណ៍ថាផ្ទះរបស់ពួកគេញ័រពេញផ្ទះ គួរឱ្យតក់ស្លុត។
គួរឱ្យដឹងដែរថា នៅក្នុងថ្ងៃទី ៣១ ខែឧសភា ឆ្នាំ ២០២៥ កន្លងទៅនេះ មានការរញ្ជួយដីចំនួន ៣ ដងជាប់ៗគ្នា។ ទីមួយមានកម្លាំង ២.៦ រ៉ិចទ័រ និង ជម្រៅ ២ គីឡូម៉ែត្រ កើតឡើងនៅវេលាម៉ោង ៨ និង ៥១ នាទីយប់។ ហេតុការណ៍ទី ២ និង ទី ៣ បានកើតឡើងតែ ៣ នាទីក្រោយប៉ុណ្ណោះ ដែលមានកម្លាំង ១.៤ រ៉ិចទ័រ និង ជម្រៅ ២ គីឡូម៉ែត្រ វេលាម៉ោង ១០ និង ១២ នាទីយប់។ និង មានកម្លាំង ១.៤ រ៉ិចទ័រ និង ជម្រៅ ៣ គីឡូម៉ែត្រ ក្នុងវេលាម៉ោង ១០ និង ១៥ នាទីយប់៕
