ចូលដល់ខែ តុលា គឺជារដូវកាលនៃការប្រារព្ធពិធីបុណ្យខ្មោច Halloween ជាបុណ្យដ៏ល្បីល្បាញនៅប៉ែកអឺរ៉ុប និង ត្រូវបានបណ្តាប្រទេសនៅទូទាំងពិភពលោក យកមកបង្កើតជាកម្មវិធីជួបជុំរីករាយផ្សេងៗ។
ជាកម្មវិធីធ្វើឡើងបែបព្រឺព្រួច និង ពញ្ញាក់អារម្មណ៍សប្បាយៗ តែអ្នកស្រាវជ្រាវទើបបានរកឃើញថ្មីថ្មោងថា ថ្ងៃបុណ្យ Halloween ដែលតែងធ្វើឡើងនៅចុងខែ តុលា ថ្ងៃទី ៣១ នេះ គឺជាថ្ងៃដែលឯកាបំផុតសម្រាប់អ្នកអត់គូ ឬ ធ្វើឱ្យអ្នកអត់គូមានអារម្មណ៍ថាខ្លួនឯងគ្មានភាពសំខាន់ទៅវិញ។
ជាក់ស្តែង គេហទំព័រគូស្នេហ៍ Dating.com គេបានស្ទង់មតិទៅលើអ្នកអត់គូ ឬ នៅលីវ ប្រមាណ ១០០០ នាក់ ដោយរកឃើញថា អ្នកអត់គូភាគច្រើនមានអារម្មណ៍ឯកានៅថ្ងៃ Halloween ហើយវាកាន់តែជាថ្ងៃឯកាជាងថ្ងៃបុណ្យសំខាន់ផ្សេងៗដូចជា ថ្ងៃ Valentine’s Day និង ថ្ងៃឆ្លងឆ្នាំ។
ក្នុងនោះ ៥៩% នៃអ្នកអត់គូបានបង្ហាញថា ថ្ងៃ Halloween គឺជាថ្ងៃដែលពួកគេមានអារម្មណ៍ពិបាកចិត្តបំផុត និង ៥៧% គិតថា វាជាថ្ងៃដ៏អាក្រក់ជាងទិវានៃក្តីស្រលាញ់ ឬ Valentine’s Day ទៅទៀត។ ហើយមាន ៧៩% មានអារម្មណ៍ឯកា និង ភាគរយលើសពាក់កណ្តាលបានយំនៅពេលពួកគេបើកទ្វារ ក្រោយត្រូវបានពញ្ញាក់អារម្មណ៍ដោយក្រុមគ្រួសារ ឬ មិត្តភក្តិ។
ដោយឡែក ក្នុងចំណោមអ្នកត្រូវបានស្ទង់មតិខាងលើ ក៏មាន ៧៧% បានសារភាពថា ពួកគេបានសម្តែងធ្វើជាមានគម្រោងនៅថ្ងៃ Halloween ខណៈដែល ៦២% កម្រប្រាប់ពីអារម្មណ៍ពួកគេទៅកាន់អ្នកដទៃ ឬ មនុស្សជិតស្និទ្ធ ដោយសម្តែងធ្វើជាធម្មតា ធ្វើជារីករាយនឹងកម្មវិធី ទាំងដែលក្នុងខ្លួនមានអារម្មណ៍ឯកាជាខ្លាំង៕
ប្រភព៖ NYP
