ពិតណាស់ មហាជនអ្នកគាំទ្រតាមដានសកម្មភាពសប្បុរសធម៌របស់អ្នកសិល្បៈបានចាប់អារម្មណ៍ហើយ កាលពីប៉ុន្មានថ្ងៃកន្លងទៅ តារាច្រៀងស្រី ប៉ាច គីមមួយ និង គូដណ្ដឹង បានរួមដំណើរជាមួយសិល្បករច្រើនរូបទៀត ទៅកាន់ប្រទេសកូរ៉េខាងត្បូង ដើម្បីធ្វើមូលនិធិសប្បុរសធម៌ប្រមូលថវិកាជួយដល់កងទ័ពជួរមុខ។
ដោយឡែក ក្រោយត្រឡប់ពីប្រទេសកូរ៉េប៉ុន្មានថ្ងៃ ថ្មីៗនេះ ក៏បានឃើញតារាចម្រៀងស្រី ប៉ាច គីមមួយ បានចេញដំណើរទៅកាន់ប្រទេសម៉ាឡេស៊ីបន្តទៀត ក្រោយនាងត្រូវបានប្រកាសជ្រើសរើសជាតារាចម្រៀងស្រីតំណាងប្រទេសកម្ពុជា ដើម្បីចូលរួមសម្តែងក្នុងព្រឹត្តិការណ៍ប្រគំតន្ត្រីមិត្តភាពអាស៊ាន ASEAN Friendship Concert 2025។
ព្រឹត្តិការណ៍ប្រគំតន្ត្រីមិត្តភាពអាស៊ាន ឆ្នាំ ២០២៥ ASEAN Friendship Concert 2025 រៀបចំឡើងនៅថ្ងៃទី ១៨ ខែតុលា ឆ្នាំ ២០២៥ ក្នុងមហោស្រព Seri Angkasa ទីក្រុងកូឡាឡាំពួរ ប្រទេសម៉ាឡេស៊ី ដែលតារាចម្រៀងកម្ពុជា ប៉ាច គីមមួយ នឹងចូលរួមសម្តែងជាមួយសិល្បករល្បីៗ ១០ រូបទៀត មកពីប្រទេសសមាជិកអាស៊ាននៅលើឆាកប្រគំតន្ត្រីដ៏អស្ចារ្យនេះ៕
