ក្រោយពីគូស្នេហ៍ស្រីថ្មី បានហុចចិញ្ចៀនសុំរៀបការនៅអាងហែលទឹកហើយនោះ កញ្ញា លី អ៊ីវ៉ាធីណា និង គូស្នេហ៍ ក៏បានភ្ជាប់ពាក្យជាផ្លូវការ ចាស់ទុំដឹងឮទាំងសងខាងហើយដែរ។ ក្នុងនោះ បើគិតមកដល់ពេលនេះ រយៈពេលប្រមាណជិត ២ ខែ ហើយ បើគិតចាប់តាំងពីថ្ងៃទី ១៧ ខែកក្កដា ឆ្នាំ ២០២៥ កន្លងមក។ ក្រោយភ្ជាប់ពាក្យរួច កញ្ញា លី អ៊ីវ៉ាធីណា បានប្រាប់មកកាន់ ប្រជាប្រិយ ថា កញ្ញា និង គូដណ្តឹង នឹងដឹកដៃគ្នាចូលរោងការនៅដើមឆ្នាំ ២០២៥ ខាងមុខនេះ។
ដោយឡែក អ្វីដែលកំពុងធ្វើឱ្យអ្នកគាំទ្រសរសើរ ទោះបីគូដណ្តឹងរបស់ កញ្ញា លី អ៊ីវ៉ាធីណា មានវ័យក្មេង មានអាយុប្អូន កញ្ញា សឹងតែពាក់កណ្តាល ប៉ុន្តែគូដណ្តឹង កញ្ញា លី អ៊ីវ៉ាធីណា បានបង្ហាញការយកចិត្តទុកដាក់ និង ទំនួលខុសត្រូវយ៉ាងពេញលេញក្នុងនាមជាអនាគតមេគ្រួសារ។ លើសពីនោះ ពីមួយថ្ងៃទៅមួយថ្ងៃ គូដណ្តឹង កញ្ញា លី អ៊ីវ៉ាធីណា បានបង្ហាញការមើលថែតារាចម្រៀងស្រីរូបនេះបានយ៉ាងល្អ អំឡុងនាងមានបញ្ហាសុខភាពផ្ទាល់ខ្លួន។
យ៉ាងណាមិញ ភ្ជាប់ពាក្យមិនប៉ុន្មានផង គូដណ្តឹង កញ្ញា លី អ៊ីវ៉ាធីណា បានរត់ទៅចាក់សាក់រូបអនាគតភរិយាធំៗនៅលើទ្រូង បង្ហាញពីចិត្តស្មោះ រហូតធ្វើឱ្យខាងស្រីមិនអាចទប់ចិត្តបានក៏បានបង្ហាញអារម្មណ៍ទាំងក្ដុកក្ដួលលើហ្វេសប៊ុកផេកថា៖ «សួរប្តីថាហេតុអីចង់សាក់រូបប្រពន្ធចឹងអត់ឈឺទេ? ប្តីថា មិនឈឺទេអូនសាក់រូបប្រពន្ធជាប់បេះដូង ព្រោះស្រលាញ់ប្រពន្ឋខ្លាំង។ ពេលប្តីទៅធ្វើការតាមខេត្ត ដូចមានប្រពន្ធនៅក្បែរបាត់ការនឹក។ អរគុណប្តីសម្លាញ់លះបង់ដើម្បីប្រពន្ធ ស្រលាញ់ប្តីខ្លាំងណាស់»៕
