ពិតណាស់ ស្របពេលបង្ហាញសកម្មភាពឯកជនដែលកំពុងប្រើជីវិតរស់នៅឯសហរដ្ឋអាមេរិកយ៉ាងស្ងប់ស្ងាត់រយៈពេលជិត ១ ឆ្នាំ ថ្មីៗកន្លងទៅនេះ តារាស្រី ឆៃ លីដាឡែន ក៏បានធ្វើឱ្យអ្នកគាំទ្រចាប់អារម្មណ៍លើរឿងរ៉ាវស្នេហារបស់នាងជាថ្មី ខណៈបានឃើញនាងបើកបង្ហាញអ្នកស្អំបេះដូងថ្មីជាបុរសអណិកជនរូបសង្ហាម្នាក់។
យ៉ាងណាមិញ ទើបតែបើកបង្ហាញចំណងស្នេហ៍ថ្មីបានមួយរយៈ មកដល់ថ្ងៃទី ១៧ ខែកក្កដា ឆ្នាំ ២០២៥ នេះ អ្នកនាង ឆៃ លីដាឡែន និង គូស្នេហ៍អណិកជនរូបសង្ហាឈ្មោះ Ally Soth បានដឹកដៃគ្នារៀបចំពិធីមង្គលហើយ ដែលរៀបចំឡើងបែបបស្ចិមប្រទេស នៅលើទឹកដីសហរដ្ឋអារិក ដោយឃើញមានការចូលរួមអបអរជូនពរពីសាច់ញាតិ បងប្អូន និង មិត្តភក្តិពេញដោយស្នាមញញឹម។
នេះបើរយៈការបង្ហោះលើហ្វេសប៊ុករបស់តារាស្រី ឆៃ លីដាឡែន រៀបរាប់ដោយក្ដីរំភើបក្នុងថ្ងៃពិសេសថា ៖ «អរគុណបងដែលចូលក្នុងជីវិតអូន Ally Soth អរគុណប៉ាម៉ាក់ បងប្អូន មិត្តភក្តិ ដែលបានចូលរួមថ្ងៃពិសេសយើងទាំងពីរ ហើយអរគុណបងប្អូន មិត្តភក្តិ និង ហ្រ្វេនៗដែលជូនពរយើងទាំងពីរ 07.17.2025»៕
