ជាការពិតណាស់ មហាជននិយមតាមដានពីរឿងរ៉ាវរបស់លោក ជ័យ សូវ៉ាត ច្បាស់ជាបានជ្រាបហើយថា ក្រៅពីមានអាជីពជាតារាចម្រៀងហើយនោះ តារាចម្រៀងប្រុសរូបនេះ ក៏មានអាជីពក្រៅសិល្បៈ ដែលគ្រប់គ្នាតែងសរសើរ និង មានក្តីស្រមៃចង់ធ្វើនោះ គឺជាគ្រូពេទ្យ។
កន្លងមក លោក ជ័យ សូវ៉ាត បានធ្វើការទៅតាមជំនាញជាគ្រូពេទ្យរបស់លោកជួយដល់សង្គមជាច្រើនមកហើយ ដោយអំឡុងពេលកូវីដ ១៩ លោកបានលះបង់ពេលវេលា និង កម្លាំងកាយចិត្តឈរជើងជាកងទ័ពអាវសអស់រយៈពេលប្រមាណ ៣ ឆ្នាំ។ លើសពីនោះ នៅចុងឆ្នាំ ២០២៤ កន្លងទៅ លោក ជ័យ សូវ៉ាត ក៏បានបញ្ចប់ថ្នាក់វេជ្ជបណ្ឌិត និង បានធ្វើបទបង្ហាញ និក្ខេបទថ្នាក់វេជ្ជបណ្ឌិតដោយជោគជ័យហើយដែរ។ បច្ចុប្បន្ន លោកក៏ជាម្ចាស់ឱសថស្ថានមួយកន្លែងនៅក្នុងទីក្រុងភ្នំពេញដូចគ្នា។
ស្របពេលការងារកំពុងតែជោគជ័យ ថ្មីៗនេះ លោក ជ័យ សូវ៉ាត បានប្រកាសដំណឹងល្អម្តងទៀត ធ្វើឱ្យមហាជនមានការកោតសរសើរដល់លោកយ៉ាងខ្លាំង ដោយលោកទទួលបានអាហារូបករណ៍ទៅសិក្សាថ្នាក់អនុបណ្ឌិត ជំនាញឯកទេសសើស្បែក នៅប្រទេសកូរ៉េ។ ក្នុងនោះ លោក ជ័យ សូវ៉ាត នឹងចាកចេញទៅបន្តការសិក្សានៅឯប្រទេសកូរ៉េនៅថ្ងៃទី ១៧ ខែកញ្ញា ឆ្នាំ ២០២៥ ខាងមុខនេះ ដោយរៀនរយៈពេល ២ ឆ្នាំ៕
