មហាជនអ្នកតាមដានការងារសិល្បៈរបស់តារាចម្រៀងរ៉េប KingChi ច្បាស់ជាបានជ្រាបហើយថា តារាចម្រៀងរ៉េបប្រចាំផលិតកម្ម CG Movement រូបនេះ ក៏ត្រូវបានចាត់ទុកជាតារាចម្រៀងរ៉េបមួយរូបមានប្រជាប្រិយភាព ព្រមទាំងសមត្ថភាពមិនធម្មតាក្នុងចំណោមតារាចម្រៀងរ៉េបជួរមុខនៅកម្ពុជា។
ក្នុងនោះដែរ លោក KingChi តែងត្រូវបានតារាចម្រៀងរ៉េបសិស្សច្បង ក៏ដូចជាតារាចម្រៀងរ៉េបរួមជំនាន់សរសើរ ចំណែកឯតារាចម្រៀងរ៉េបស្រករក្រោយៗ ក៏តែងគោរពដើរតាមគន្លង ស្ញប់ស្ញែងពីជំនាញរ៉េបរបស់លោក KingChi ថែមទៀតផង។
យ៉ាងណាមិញ បើទោះជាស្ថិតក្នុងនាមជាតារាចម្រៀងរ៉េបមានភាពល្បីល្បាញក៏ពិតមែន ស្រាប់តែថ្មីៗនេះ លោក KingChi បានបង្ហាញអារម្មណ៍ សរសើរដល់លោក នីកូ ដែលជារៀមច្បងក្នុងសិល្បៈមួយរូបដែលគួរឱ្យគោរព ក្នុងនាមជាអ្នកគាំទ្រ។ ក្នុងនោះដែរ លោក KingChi បានចែករំលែកនូវវីដេអូនៃការសម្តែងរបស់លោក នីកូ ព្រមទាំងភ្ជាប់នឹងសារមួយថា៖ «Idol តាំងពីញុមនៅក្មេង គាត់នៅតែឡូយ»។
ជាការពិតណាស់ លោក KingChi មិនមែនជាតារាដំបូងនោះទេ ដែលបានសរសើរដល់លោក នីកូ ពោលគឺមានតារាប្រុសស្រី និង មហាជនជាច្រើនតែងសរសើរពីលោក នីកូ ថាមិនត្រឹមតែមានរូបសម្រស់ស្រស់សង្ហានោះទេ តែបើនិយាយពីសមត្ថភាពក្នុងសិល្បៈរបស់លោកនោះវិញ គឺសម្បូរបែប គ្រប់ជំនាញ៕
