នៅយប់ទៀបភ្លឺម៉ោង ៣ និង ២០ នាទីអធ្រាត្រ ឈានចូលថ្ងៃទី ១៨ ខែសីហា ឆ្នាំ ២០២៥ នេះ ប្រទេសថៃ បានប្រទះករណីភ្លើងឆេះព្រះវិហារជាថ្មី ដោយលើកនេះជាវិហារយ៉ាងប្រណីត ស្ថិតនៅក្នុងវត្តល្បីមួយ នាខេត្តឈៀងម៉ៃ។
តាមព័ត៌មានបានឱ្យដឹងថា វត្តខាងលើនេះ មានឈ្មោះថាវត្តវេឡុវ័ន ឬវត្តប៉ាផៃ ស្ថិតក្នុងឃុំមឿងកែវ ស្រុកម៉ែរីម ខេត្តឈៀងម៉ៃ។ ក្នុងនោះ អគ្គិភ័យបានលេបត្របាក់ព្រះវិហារនៃវត្តនេះស្ទើរតែទាំងស្រុង បង្កឱ្យមានការខូចខាតទឹកប្រាក់អស់ ៣ លានបាន ដែលស្មើប្រមាណជិត ១០ ម៉ឺនដុល្លារ។ ដោយឡែក ខាងអាជ្ញាធរបានធ្វើការអន្តរាគមន៍ ដោយប្រើឡានទឹកអស់ចំនួន ១ គ្រឿង ទើបអាចពន្លត់ភ្លើងបាន។
យ៉ាងណាមិញ សម្រាប់មូលហេតុនៃការឆាបឆេះនេះ អាជ្ញាធរបានសន្និដ្ឋានថា អាចបណ្តាលមកពីការឆ្លងចរន្តអគ្គិសនី ឬម្យ៉ាងទៀតអាចបណ្តាលមកពីការអុជទៀនធូបនៅក្នុងវិហារនេះតែម្តង ព្រោះកាលពីម្សិលមិញគឺជាថ្ងៃសីល ដូច្នេះទើបមានការអុជទានធូបបូជា តែមិនមានអ្នកចាំមើល ឬពន្លត់ឱ្យបានត្រឹមត្រូវ ទើបបង្កឱ្យមានការឆាបឆេះ៕
ប្រភព៖ Khaosod
