មហាជននិយមតាមដានរឿងរ៉ាវសិល្បៈ ជាពិសេសពាក់ព័ន្ធនឹងម្ចាស់ពានកម្មវិធី The Voice Cambodia រដូវកាលទី ១ លោក ប៊ុត សីហា ច្បាស់ជាបានជ្រាបខ្លះៗមកហើយ នូវព្យុះភ្លៀងរឿងរ៉ាវអាស្រូវរបស់លោកជាបន្តបន្ទាប់។
យ៉ាងណាមិញ ក្រោយភ្លៀងមេឃស្រឡះហើយនោះ មួយរយៈធំចុងក្រោយនេះ លោក ប៊ុត សីហា ក៏មិនបានលេចឮនូវព័ត៌មានមិនល្អណាមួយទៀតដែរ ដោយលោកក៏បានវិលត្រឡប់មកកាន់វិស័យសិល្បៈជាថ្មី និង បានចេញចម្រៀងទៀតផង។ លើសពីនោះ ក្រៅពីអាជីពសិល្បៈ លោក ប៊ុត សីហា ក៏ជាបុគ្គលិកនៅក្នុងហាងរបស់លោក រិទ្ធ អេមេហ្គា ដែលគេស្គាល់ថាជាអ្នកដឹកនាំមួយរូប និង ជាអ្នកបើកឱកាសជ្រោមជ្រែងឱ្យ ប៊ុត សីហា ចូលមកកាន់វិស័យចម្រៀងជាថ្មី។
យ៉ាងណាមិញ ស្រាប់តែនៅថ្ងៃទី ២២ ខែឧសភា ឆ្នាំ ២០២៥ នេះ លោក រិទ្ធ អូមេហ្គា បានចេញមកបង្ហោះសារថា លោក ប៊ុត សីហា លែងជាបុគ្គលិកនៅហាងរបស់លោកហើយ ព្រមទាំងបានបន្ថែមថា ប៊ុត សីហា បញ្ឈប់អាជីពជាតារាចម្រៀងហើយ ក៏ព្រោះតែលោក ប៊ុត សីហា ទទួលរងការមាក់ងាយមិនបាន។
ក្នុងនោះ លោក រិទ្ធ អូមេហ្គា បានបង្ហោះសារចំនួន ២ ជាបន្តបន្ទាប់ ដោយសារទី ១ រៀបរាប់ថា៖ «ខ្ញុំសូមប្រកាសបុគ្គលឈ្មោះ ណុប គីមសេង ហៅ យក្ស និង ប៊ុត សីហា លែងជាបុគ្គលិកនៅហាង Ella House របស់ខ្ញុំ និង YK lab (យុគៈ) ទៀតហើយ ដូចនេះរាល់ទង្វើ ឬរឿងអ្វី ដែលបុគ្គលទាំង ២ នេះសាង លែងពាក់ព័ន្ធអីជាមួយនឹងខ្ញុំ និង ហាងខ្ញុំតទៀតហើយ»។
រីឯសារទី ២ រៀបរាប់ថា៖ «ខ្ញុំសូមមិននិយាយអ្វីទាំងអស់! បញ្ជាក់ សីហា មិនបានទៅជក់ថ្នាំទៀតទេ តែគាត់ប្រាប់ខ្ញុំថា គាត់ពិបាករងសម្ពាធនឹងពាក្យគេមើលងាយ រើសអើងគាត់ ពេលគាត់អាន comment មានអ្នករិះគុណគាត់ ជេរគាត់ ហើយពេលនៅហាង មានគេហៅគាត់ អាតារាបែកថ្នាំ អាជាប់គុក គាត់ខ្មាស់គេ។ សីហា សុំខ្ញុំឈប់ច្រៀង ហើយសុំរស់នៅតាមសមាជីវធម្មតាវិញ។ ខ្ញុំសុខចិត្តខ្មាស់គេមួយប្រទេស ខ្ញុំសុំទោសផង ដែលបានអះអាងជួយ សីហា បាន តែចុងក្រោយនៅតែមិនអាចឱ្យ សីហា មានទីផ្សារ ចូលសិល្បៈវិញបាន។ តែខ្ញុំពិតជាបានខំអស់ហើយ ខ្ញុំជួយគេ តែផល ដែលបានមកវិញមានតែការខកចិត្ត។ Album សីហា ៦ បទ ខ្ញុំនឹងទុកផ្តល់ឱកាសជួយអ្នកផ្សេង ដែលគេចង់ច្រៀង ចង់ល្បី ពិតប្រាកដ»៕
