រយៈពេល ១ សប្ដាហ៍ហើយដែលពិធីការិនី ហ៊ិន ច័ន្ទនីរ័ត្ន បានឃើញមុខកូនប្រុសដំបូងដ៏គួរឱ្យក្នាញ់ ដោយអ្នកនាងបានសម្រាលកូនប្រកបដោយសុវត្ថិភាពកាលពីថ្ងៃទី ៨ ខែកក្កដា ឆ្នាំ ២០២៥ កន្លងទៅ ដែលទទួលបានការអបអរស្វាគមន៍យ៉ាងកក់ក្ដៅពីបងប្អូន មិត្តភក្តិ អ្នកសិល្បៈ និង មហាជនអ្នកគាំទ្រលើបណ្ដាញសង្គម។
ចំពោះកូនប្រុសដំបូងរបស់ពិធីការិនីរូបនេះ សម្រាលមកប្រកបដោយសុវត្ថិភាព និង សុខភាពល្អ ដែលមើលទៅមុខមាត់ឡើងក្រឡង់ៗ សាច់ឈាមទ្រលុកទ្រលន់គួរឱ្យក្នាញ់ខ្លាំង កាត់ដូចទាំងម៉ាក់ទាំងប៉ា និង មានឈ្មោះយ៉ាងពីរោះថា ឌី ពេជ្ររ័ត្នបញ្ញាបុត្រ។
រីឯអ្នកម៉ាក់ថ្មីថ្មោង ហ៊ិន ច័ន្ទនីរ័ត្ន វិញ បើចាប់អារម្មណ៍លើរូបសម្រស់របស់អ្នកនាង តែងត្រូវបានមហាជនអ្នកគាំទ្រសរសើរខ្លាំងតាំងពីពពោះមកម្ល៉េះ មិនត្រឹមតែមានសុខភាពល្អ តែនាងរក្សាសម្រស់បានស្រស់ស្អាត មុខមាត់ផូរផង់ដូចកាលនៅខ្លួនមួយដដែល។
យ៉ាងណាមិញ ក្រោយពីសម្រាលកូនរួច ថ្មីៗនេះ ក៏បានឃើញពិធីការិនី ហ៊ិន ច័ន្ទនីរ័ត្ន បង្ហោះសារចែករំលែកលើកទឹកចិត្តដល់បងប្អូនស្រ្តីជាម្ដាយគ្រប់រូប ឱ្យគិតគូរថែរក្សាសុខភាពឱ្យបានល្អជាចម្បង និង សំខាន់បំផុត រីឯសម្រស់វិញជារឿងបន្ទាប់ដែលអាចមើលថែខ្លួននៅពេលក្រោយបាន។
ក្នុងនោះ អ្នកនាង ហ៊ិន ច័ន្ទនីរ័ត្ន បានរៀបរាប់ថា ៖ «រូបថតពេលពពោះនេះ ជាការចងចាំដ៏ល្អសម្រាប់ខ្លួនខ្ញុំ និង ស្វាមី ព្រមទាំងកូននៅក្នុងផ្ទៃ មិនថាម្តាយពពោះស្អាត ឬ មិនស្អាត គឺមិនសំខាន់ សំខាន់ឱ្យតែកូនមានសុខភាពល្អ គឺគ្រប់គ្រាន់ ចាំមានពេលថែខ្លួនឡើងវិញក៏មិនយឺតពេល ឃើញបងប្អូនបានសរសើរនាងខ្ញុំច្រើនថាសម្រស់នៅដដែល ហើយបងប្អូនខ្លះថាពេលទម្ងន់មិនស្អាត ខ្ញុំសូមលើកទឹកចិត្តបងៗស្រ្តីជាម្តាយគ្រប់រូបថែរក្សាសុខភាពជាចម្បង សម្រស់គឺបន្ទាប់បន្សំ បងៗបានលះបង់ប៉ុណ្ណេះគឺអស្ចារ្យណាស់ ដូច្នេះកុំតូចចិត្ត ឬបោះបង់ខ្លួនឯង បងៗជាមនុស្សដ៏ពូកែរបស់កូនៗ ស្រឡាញ់ខ្លួលឯងឱ្យបានច្រើនណាអ្នកម្តាយគ្រប់រូប»៕
