នៅថ្ងៃទី ២៦ ខែកុម្ភៈ ឆ្នាំ ២០២៥ នេះ មហាជនអ្នកប្រើប្រាស់បណ្ដាញសង្គម បាននាំគ្នាសម្ដែងក្ដីអាណិតអាសូរ និង ចែករំលែកបន្តគ្នាព្រោងព្រាត បន្ទាប់ពីបុរសម្នាក់បង្ហោះសាររៀបរាប់ត្រូវបានចោរប្លន់ ២ នាក់ពីក្មួយ នៅម្ដុំផ្លូវទំនប់កប់ស្រូវ រាជធានីភ្នំពេញ។
ទាក់ទិនទៅនឹងករណីនេះ បើតាមការឱ្យដឹងពីគណនីដែលមានឈ្មោះ Phon Borey ដែលជាជនរងគ្រោះ បានបង្ហោះសារនៅថ្ងៃទី ២៦ ខែកុម្ភៈ ឆ្នាំ ២០២៥ នេះ ឱ្យបានដឹងថា ៖ «ទុក្ខជាន់ទុក្ខ ពូខ្ញុំស្លាប់ ចំណែកខ្ញុំ និង ពូខ្ញុំម្នាក់ទៀតត្រូវចោរប្លន់ម៉ូតូ។ ខ្ញុំ និង ពូរបស់ខ្ញុំម្នាក់ទៀត ត្រូវបានក្រុមចោរធាក់ប្លន់យកម៉ូតូបានសម្រេចចំនួន ២ គ្រឿង បន្ទាប់ពីខ្ញុំចេញពីជូនដំណើរពូខ្ញុំម្នាក់ទៀត ដែលបានស្លាប់ជាលើកចុងក្រោយនៅមន្ទីពេទ្យជាតិតេជោសន្តិភាព»។
តាមប្រភពពីជនរងគ្រោះ បានរៀបរាប់បន្តឱ្យដឹងថា ៖ «បន្ទាប់ពីខ្ញុំជិះចេញពីមន្ទីរពេទ្យតែបន្តិច ក៏មានក្រុមចោរមកធាក់ម៉ូតូខ្ញុំដួលប្លន់យកម៉ូតូខ្ញុំ និង ពូខ្ញុំ នៅម្តុំផ្លូវទំនប់កប់ស្រូវ ដែលឆ្ងាយពីមន្ទីពេទ្យជាតិតេជោសន្តិភាពតែបន្តិចប៉ុណ្ណោះ ដែលធ្វើឱ្យខ្ញុំរងរបួសច្រើនកន្លែងផងដែរ។ ខ្ញុំបាទសុំឱ្យបងៗសមត្ថកិច្ចនៅរាជធានីភ្នំពេញទាំងអស់ សូមមេត្តាជួយរកម៉ូតូខ្ញុំ ម៉ូតូពូខ្ញុំ និង ឆាប់ចាប់បានក្រុមចោរប្លន់។ បាត់ម៉ូតូដែលចោរប្លន់ ចំនួន ២ គ្រឿង Dream 024 ពណ៌ខ្មៅ ផ្លាកលេខ ភ្នំពេញ 1KN-5679 និង Dream 017 ពណ៌ខ្មៅ ផ្លាកលេខ ភ្នំពេញ 1GP-7101។ ម៉ោងកើតហេតុ ថ្ងៃទី ២៥ ខែ កុម្ភៈ ម៉ោង ១១:៤៥ យប់»៕
