នៅវេលាម៉ោង ៨ យប់ថ្ងៃទី ១៨ ខែមិថុនា ឆ្នាំ ២០២៥ នេះ មហាជនអ្នកគាំទ្រលើបណ្ដាញសង្គមបានផ្ទុះចែករំលែកបង្ហាញការសោកស្ដាយខ្លាំង ក្រោយពីទទួលដំណឹងពីករណីអគ្គិភ័យបានឆាប់ឆេះហាងថ្មីរបស់តារាស្រី ពេជ្រ ចរណៃ ដែលទើបរៀបចំរួចត្រូវខូចខាតសម្ភារៈទាំងស្រុង។
ចំពោះហាងរបស់តារាស្រីរូបនេះ ត្រូវបានគេដឹងថាជាហាងថ្មីដែលនាងទើបតែរៀបចំរួច និង ត្រៀមសម្ភោធដំណើរការ ដែលមានចែកជា ៣ ផ្នែក មានអាហារដ្ឋានម្ហូបកម្ម៉ង់បែបខ្មែរ កាហ្វេល្បុក្កតោខ្មែរ និង ជាកន្លែងបង្ហាត់ក្បាច់គុនបុរាណខ្មែរផងដែរ។
បើតាមរយៈការរៀបរាប់ក្នុងវីដេអូសម្ភាសរបស់ ពេជ្រ ចរណៃ ក្រោយអគ្គិសភ័យឆាប់ឆេះហាងថ្មីនេះដែរ បានឱ្យដឹងថាហាងថ្មីនេះនាងបានរៀបចំឡើងដោយជួលផ្ទះរបស់គេក្នុង ១ ខែជាង ៣០០០ ដុល្លារ ជាប្រភេទផ្ទះវីឡា ដែលទាំងការរៀបចំផ្ទះ និង រចនាទៅជាហាងនេះដែរ គឺនាងចំណាយអស់រាប់សិបម៉ឺនដុល្លារ ជាកម្លាំងញើសឈាមរបស់នាង ព្រមទាំងមានការកម្ចីធនាគារៀបចំបន្ថែមទៀត។
ជាមួយគ្នានេះ អ្វីដែលធ្វើឱ្យមហាជនកាន់តែបង្ហាញការស្ដាយ និង អាណិតចំពោះតារាស្រីរូបនេះ បន្ទាប់ពីអគ្គិភ័យឆាប់ឆេះខូចខាតទាំងស្រុងនេះដែរ ពេជ្រ ចរណៃ មិនត្រឹមតែខាតបង់លើការរៀបចំហាងទាំងអស់នោះទេ នាងថែមទាំងត្រូវទទួលបន្ទុកចំណាយលុយច្រើនជាងពេលរៀបចំហាងគុណនឹង ២ ដើម្បីជួសជុលសាងសង់ផ្ទះជួលឱ្យម្ចាស់គេឡើងវិញទៀត ដែលពេលនេះនាងក៏បានឱ្យដឹងថានាងបានចំណាយលុយអស់ពីខ្លួនតាំងពីរៀបចំហាងមកម្ល៉េះ៕
