នៅថ្ងៃទី ១៤ ខែកញ្ញា ឆ្នាំ ២០២៥ កន្លងទៅ មានការរាយការណ៍ពីករណីប្រទះឃើញក្រពើមួយក្បាល កណ្តាលទឹកជំនន់នាខេត្តអយុធ្យា ប្រទេសថៃ ដែលបណ្តាលឱ្យអ្នកស្រុកនាំគ្នាភ័យខ្លាចខ្លាំង។
តាមព័ត៌មានបានឱ្យដឹងថា មានស្រ្តីចំណាស់ម្នាក់វ័យ ៧៩ ឆ្នាំ ជាអ្នកស្រុករស់នៅក្នុងឃុំថាឌិនឌេង ស្រុកផាក់ហៃ ខេត្តអយុធ្យា ដែលជាតំបន់កំពុងរងគ្រោះពីទឹកជំនន់ បានអះអាងថាបានឃើញក្រពើមួយក្បាលប្រវែងប្រហែលជា ១ ម៉ែត្រ នៅក្រោមផ្ទះរបស់ខ្លួន ខណៈកំពុងសម្អាតផ្ទះ។ ស្រ្តីរូបនេះបានឱ្យដឹងទៀតថា ក្រពើមួយក្បាលនេះមើលទៅមិនបានបង្ហាញភាពកាចសាហាវអ្វីទេ វាគ្រាន់តែបង្ហាញខ្លួនតែមួយភ្លែត ហើយក៏បាត់ទៅវិញ ប៉ុន្តែវានៅតែបង្កជាការព្រួយបារម្ភ។
យ៉ាងណាមិញ អាជ្ញាធរប្រចាំតំបន់បានបញ្ជាក់ថា ក្រពើនេះពិតជាបានបង្ហាញខ្លួនពិតមែន ហើយក៏បានប្រកាសអាសន្នឱ្យប្រជាជនមានការប្រុងប្រយ័ត្នផងដែរ។ លើសពីនេះក៏បានរៀបចំឱ្យមានកងកម្លាំងការពារនៅពេលយប់ ជាពិសេសគឺនៅកន្លែងដែលប្រទះឃើញក្រពើតែម្តង៕
ប្រភព៖ Khaosod
