ថ្មីៗនេះមានរឿងរ៉ាវរបស់ជនជាតិម៉ាឡេស៊ីម្នាក់ ដែលត្រូវសង្សារដាច់ចិត្តលួចយកឡានទៅលក់ ហើយទិញកាបូប Chanel យកទៅហាយសូរ ចូលសង្គមអ្នកមាន។
តាមព័ត៌មានបានឱ្យដឹងថា បុរសម្នាក់នេះ មានឡានមួយគ្រឿងម៉ាក Perodua Myvi ដែលជាកេរ្តិ៍មរតករបស់គ្រួសារ ហើយបានជិះ និងមើលថែវាអស់រយៈពេលជាង ១០ ឆ្នាំទៅហើយ។ លុះថ្ងៃមួយនៅសុខៗស្រាប់តែបាត់ឡាន បុរសរូបនេះក៏បានទៅសួរនាំស្រ្តីជាសង្សារ នាងក៏ឆ្លើយថានាងបានលក់វាបាត់ទៅហើយ ព្រោះមើលទៅវាស្រែពេក ហើយនាងត្រូវការលុយទៅទិញកាបូបប្រ៊េន Chanel ដើម្បីយកទៅហាយសូរ ចូលជាមួយនឹងក្រុមមិត្តថ្មីរបស់នាង។
អ្វីដែលគួរឱ្យហួសចិត្តនោះ នាងបានលក់ឡាននេះជាការឱ្យអ្នកទិញបង់រំលោះ ហើយនៅពេលលុយបានមិនគ្រប់ទិញកាបូប នាងបានឱ្យបុរសជាសង្សារចេញលុយផ្ទាល់ខ្លួនឱ្យនាងទៀត ដោយនាងអះអាងបើនាងត្រូវគេមើលងាយ នោះសង្សារនាងក៏ត្រូវខ្មាសគេដែរ។ ដោយឡែក បុរសជាសង្សារពិតជាមានការខកចិត្តជាខ្លាំង ដោយមិននឹកស្មានថានាងឱ្យតម្លៃទៅលើភាពសម្ភារៈនិយម ច្រើនជាងឱ្យតម្លៃស្នេហាដែលខំសាងជាមួយគ្នាអស់ជាច្រើនឆ្នាំឡើយ៕
ប្រភព៖ Khaosod
