ប៉ុន្មានថ្ងៃកន្លងមកនេះ ទឹកទន្លេចៅផ្រះយ៉ាហាក់កាន់តែហក់ឡើងយ៉ាងគំហុក ដោយបណ្តាលមកពីឥទ្ធិពលនៃព្យុះតូចធំដែលឆ្លងកាត់ប្រទេសថៃមិនឈប់ឈរ ហើយក្នុងនោះដែរ ទីក្រុងបាងកកគឺកំពុងតែប្រឈមយ៉ាងខ្ពស់ចំពោះហានិភ័យទឹកជំនន់។
ដោយឡែក អភិបាលក្រុងបាងកក Chadchart Sittipunt បានបញ្ជាក់ឱ្យដឹងថា ស្ថានភាពទឹកទន្លេចៅផ្រះយ៉ាកំពុងស្ថិតនៅក្រោមការគ្រប់គ្រងនៅឡើយ ដោយកម្រិតទឹកបច្ចុប្បន្ននៅទាបជាងខឿនការពារប្រមាណ ៧០ សង់ទីម៉ែត្រ។ លោកក៏បានត្រៀមរួចរាល់ក្នុងការរៀបបាវខ្សាច់ការពារ និងដាក់ពង្រាយម៉ាស៊ីនបូមទឹកនៅតាមបណ្តោយមាត់ទន្លេ និងចាត់ឱ្យមានអាជ្ញាធរនៅចាំពិនិត្យមើល ២៤ ម៉ោងផងដែរ។
យ៉ាងណាមិញ ក្នុងនោះមាន ១១ សហគមន៍នៅក្នុងទីក្រុងបាងកក ដែលអាចនឹងងាយរងគ្រោះ និងប្រឈមចំពោះទឹកជំនន់ជាងគេ ដែលក្នុងនោះមានដូចជាខណ្ឌដុសិតមានចំនួន ២ សហគមន៍ ខណ្ឌព្រះនគរមានចំនួន ១ សហគមន៍ ខណ្ឌបាងខ លេមមាន ៤ សហគមន៍ ខណ្ឌយ៉ានណាវ៉ាមាន ១ សហគមន៍ ខណ្ឌបាងកកតូចមាន ១ សហគមន៍ ខណ្ឌខ្លងសានមាន ២ សហគមន៍៕
ប្រភព៖ Khaosod
