មានករណីរបស់នារីម្នាក់ ដែលជាជនរងគ្រោះនៅក្នុងហេតុការណ៍រញ្ជួយដីនាប្រទេសមីយ៉ាន់ម៉ា បានធ្វើឱ្យមហាជនមានការរំជួលចិត្តអាណិតជាខ្លាំង ដោយនាងបានជាប់នៅក្នុងគំនរសណ្ឋាគាររលំជាង ៥០ ម៉ោង តែចុងក្រោយរួចខ្លួនមកបានដោយសារតែទឹកសុទ្ធ ៤ ដប។
តាមព័ត៌មានបានឱ្យដឹងថា នារីរូបនេះបានជាប់នៅក្នុងគំនរសណ្ឋាគារមួយកន្លែង នាទីក្រុង Mandalay ប្រទេសមីយ៉ាន់ម៉ា។ នាងបានជាប់នៅក្នុងនោះជាង ៥០ ម៉ោង តែនាងអាចរក្សាជីវិតរបស់ខ្លួនបាន គឺព្រោះតែនាងមិនភិតភ័យ និង មានសតិ នាងដឹងខ្លួនថានាងចេញក្រៅមិនរួច ទើបនាងព្យាយាមរកវិធីរក្សាកម្លាំង ដោយការផឹកទឹក ៤ ដបដែលមាននៅក្នុងបន្ទប់ និង រងចាំទាល់តែមានអ្នកមកសង្រ្គោះនាងចេញទៅក្រៅ។
យ៉ាងណាមិញ តាមព័ត៌មានបានឱ្យដឹងថា នាងស្ថិតក្នុងសភាពទន់ខ្សោយខ្លាំងណាស់នៅពេលដែលនាងត្រូវបានគេជួយសង្រ្គោះ តែនាងមិនបង្ហាញការភិតភ័យអ្វីឡើយ។ ដោយឡែក មានមនុស្សចំនួន ៥ នាក់ដែលបានជាប់ក្នុងសណ្ឋាគារខាងលើ ក្នុងនោះគេសង្រ្គោះបាន ២ នាក់ហើយ តែមានតែម្នាក់ដែលនៅមានជីវិតប៉ុណ្ណោះ ហើយម្នាក់នោះគឺជារូបនាងនេះឯង៕
ប្រភព៖ Sanook
