ទឹកដៃមិនធម្មតា! កូនខ្មែររូបនេះ ជំនាញថតរូប និង បង្កើតវីដេអូពាណិជ្ជកម្មស្តង់ដារឱ្យតារាល្បីៗឡូយអស់ស្ទះ

លោក អាឡិច ប៊ុនថា ឬមានឈ្មោះពិតថា ធឿង ប៊ុនថា លោកគឺជាអ្នកថតរូបបែប Portrait (រូបមនុស្ស) ដ៏ជំនាញមួយរូប និង ជាអ្នកដែលមានស្នាដៃលេចធ្លោនៅពីក្រោយរូបភាពតារាល្បីៗ និង ពាណិជ្ជកម្មធំៗនៅកម្ពុជា។ ស្នាដៃរបស់លោកត្រូវបានបង្ហាញ និង ផ្សព្វផ្សាយទាំងនៅលើប្រព័ន្ធអនឡាញ ផ្ទាំងផ្សព្វផ្សាយពាណិជ្ជកម្មនានា សុទ្ធសឹងក្រុមហ៊ុនម៉ាកយីហោល្បីៗលំដាប់ជាតិ និង អន្តរជាតិ។ បច្ចុប្បន្ន លោកជាស្ថាបនិក និង ជានាយកប្រតិបត្តិនៃ Sangkran Creative Lab ដែលជាស្ទូឌីយ៉ូថតរូប និង វីដេអូ ផ្តល់សេវាកម្មលំដាប់ជួរមុខនៅកម្ពុជា។

ការក្លាយជាអ្នកជំនាញជោគជ័យដូចសព្វថ្ងៃ ពិតមែនទៅ លោក អាឡិច ប៊ុនថា មិនបានឆ្លងកាត់ការសិក្សាជំនាញពីសាលាណាមួយនោះទេ ពោល លោករៀនសូត្រចេះដោយខ្លួន​ឯង គួបផ្សំនឹងការស្រលាញ់ ព្យាយាម រួមនឹងទេពកោសល្យខាងផ្នែកសិល្បៈតាំងតែពីតូច។ កាលរៀននៅថ្នាក់បឋមសិក្សា លោកចូលចិត្តគូររូបលេង លុះមកដល់ថ្នាក់មធ្យមសិក្សា លោកចេះស្វែងយល់ខ្លះៗអំពីការកាត់តរូបភាពនៅលើកុំព្យូទ័រ។ រហូតមកដល់ថ្នាក់ឧត្តមសិក្សា លោកចាប់ផ្តើមសិក្សាស្វែងយល់បន្ថែមនៅលើប្រព័ន្ធអ៊ីនធ័រណេត ទៅលើជំនាញថតរូប កាត់តរូបភាព និង រចនាក្រាហ្វិក។ មកដល់ឆ្នាំ ២០១៥ អំឡុងសិក្សាឆ្នាំទី ៣ លោកបានចាប់ផ្តើមសាកល្បងទៅលើជំនាញថតរូប ដោយទិញកាមេរ៉ាយកមកថតរូបបង្ហោះនៅលើបណ្តាញសង្គម ដែលធ្វើឱ្យមហាជនមានការចាប់អារម្មណ៍យ៉ាងខ្លាំង។

ជាមួយការអភិវឌ្ឍន៍ទឹកដៃពីមួយថ្ងៃទៅមួយថ្ងៃ អ្នកថតរូបដែលមានស្រុកកំណើតមកពីខេត្តបន្ទាយមានជ័យរូបនេះ ក៏មានឱកាសទទួលបានការងារមួយចំនួន ដូចជាការថតរូបសម្រាប់ហាងសាឡន និង ទស្សនាវដ្តីល្បីៗក្នុងស្រុកជាដើម។

ដោយសារស្នាដៃលេចធ្លោ លោកត្រូវបានក្រុមហ៊ុនរៀបចំកម្មវិធីប្រលងកញ្ញា​ឯកមួយទាក់ទងសម្ភាសចូលធ្វើការ។​ លោកបានធ្វើការឱ្យក្រុមហ៊ុននេះរយៈពេលមួយឆ្នាំ រួចក៏ចាប់ផ្តើមបើកស្ទូឌីយ៉ូថតរូបផ្ទាល់ខ្លួនមួយឈ្មោះថា «Alex Buntha Photography» ដោយទទួលការងារតូចធំរហូតល្បីល្បាញនៅក្នុងវិស័យថតរូបបែបហ្វេហ្សិន និង ពាណិជ្ជកម្មមកដល់សព្វថ្ងៃ។ ដូចបានរៀបរាប់នៅខាងដើម លោក អាឡិច ប៊ុនថា ក៏ជាស្ថាបនិកនៃ Sangkran Creative Lab ដែលជាភ្នាក់ងារទទួលផលិតកម្មវិធី និង ការថតផ្សព្វផ្សាយដែលមានគុណភាពលំដាប់ខ្ពស់នៅកម្ពុជា៕​