តាមរយៈកម្មវិធី Miss Cosmo Cambodia 2025 មហាជនបានផ្ទុះការចាប់អារម្មណ៍ជាបន្តបន្ទាប់ ខណៈដែលកម្មវិធីបានបង្ហាញការថតរូបរបស់បេក្ខភាព ដែលរូបភាពពីមួយវិញ្ញាសាមួយ ទៅមួយវិញ្ញាសា មើលមកពិតជាឡូយ ប្លែក ស្រស់ស្អាត ឬអាចថាជារូបភាពមានគុណភាព និង ស្តង់ដាមិនចាញ់បរទេសឡើយ។
ជាការពិតណាស់ នៅពីក្រោយរូបភាពអស្ចារ្យរបស់បេក្ខភាព គឺត្រូវបានកើតឡើងពីថ្វីដៃអ្នកជំនាញថតរូបដ៏ល្បីម្នាក់នៅកម្ពុជា នោះគឺ លោក អាឡិច ប៊ុនថា (Alex Buntha) ដែលគេស្គាល់ថា ជាអ្នកថតរូបបែប Portrait (រូបមនុស្ស) ដ៏ជំនាញ និង ទទួលបានការគាំទ្រខ្លាំងនៅក្នុងវិស័យថតរូបហ្វេហ្សិនបែបពាណិជ្ជកម្ម។
សម្រាប់វិញ្ញាសាថតរូបនៅក្នុងកម្មវិធី Miss Cosmo Cambodia 2025 លោក អាឡិច ប៊ុនថា បានរៀបចំបង្កើតរូបភាព ដោយរួមបញ្ចូលគ្នាទាំងស្ទីល Concept ការចាប់ប្លង់ និង ការកាច់ម៉ូដ បូករួមនឹងបច្ចេកទេសថត ធ្វើឱ្យរូបភាពនីមួយៗចេញមករស់រវើក អស្ចារ្យ មានភាពប្លែកភ្នែកប្រកបដោយសិល្បៈ។ ដូចបានឃើញជាក់ស្តែង ដូចជាការថតរូបបេក្ខភាពនៅកោះតាឃួន ស្ថិតក្នុងស្រុកបូរីអូរស្វាយ ខេត្តស្ទឹងត្រែង និង ថ្មីៗនេះការថតឈុតហែលទឹកជាដើម។
គួរឱ្យដឹងដែរថា លោក អាឡិច ប៊ុនថា ក៏ជាស្ថាបនិកនៃ Sangkran Creative Lab ដែលជាភ្នាក់ងារទទួលផលិតកម្មវិធី និង ការថតផ្សព្វផ្សាយ ដែលមានគុណភាពលំដាប់ខ្ពស់នៅកម្ពុជា៕
