ទឹកដៃកូនខ្មែរពិតៗ! រ៉ូប ២៦ ម៉ូដ ហ្វេហ្សិនប្រណីតខ្លាំង រំលេចអត្តសញ្ញាណ សិល្បៈ និង វប្បធម៌ខ្មែរដ៏ល្អល្អះ

ថ្មីៗនេះ តាមរយៈការដើរបង្ហាញម៉ូដក្នុងវគ្គ We Walk Runway Challenge នៃកម្មវិធី Miss Cosmo Cambodia 2025 ឃើញថាមហាជនចាប់អារម្មណ៍យ៉ាងខ្លាំង ចំពោះរ៉ូបហ្វេហ្សិនប្រមាណ ២៦ ម៉ូដ ដែលឌិនស្រោចទៅដោយត្បូង និង អង្កាំភ្លឺផ្លេក ជាពិសេស ទាក់ទាញបំផុត នឹងការរចនារំលេចនូវអ្វីដែលជាអត្តសញ្ញាណខ្មែរ។

ពីមួយឈុតទៅមួយឈុត ការឌីហ្សាញពិតជាប្លែក និង ឥតខ្ចោះ ឬអាចថាគុណភាពមិនចាញ់បរទេសឡើយ។ ជាការពិត ឈុតទាំងនេះគឺជាការរចនារបស់ម៉ាកយីហោ ដែលបង្កើតឡើងដោយកូនខ្មែរគឺ  Almée។ តាមការសរសេរលម្អិតបង្ហោះនៅលើបណ្តាញសង្គម នេះគឺជាលើកទីមួយហើយ ដែលម៉ាក Almée បង្ហាញនៅលើវេទិកា ដែលជាការសហការគ្នាជាមួយកម្មវិធី Miss Cosmo Cambodia។

ខូឡិកហ្សិននេះ លើសពីហ្វេហ្សិន វាគឺជាដំណើរតាមរយៈសិល្បៈ វប្បធម៌ និង អារម្មណ៍។ គ្រប់រ៉ូបទាំងអស់សុទ្ធតែប្រាប់ពីរឿងរ៉ាវ ប៉ាក់ដោយចំណង់ចំណូលចិត្ត ច្នៃឡើងដោយក្តីស្រលាញ់ ហើយបំផុសគំនិតដោយភាពស្រស់ស្អាតនៃពិភពលោកជុំវិញ និង នៅក្នុងខ្លួនរបស់អ្នកច្នៃម៉ូដផ្ទាល់៕